കൊല്ലം: കേരളത്തില്‍ ഇപ്പോള്‍ മുഖ്യ മന്ത്രിമാര്‍ ഒന്നിലധികമുണ്ടെന്ന് വെള്ളാപ്പള്ളി നടേശന്‍.  കോണ്‍ഗ്രസില്‍ തന്നെ രണ്ട് മുഖ്യ മന്ത്രിമാരുണ്ട്. ഉമ്മന്‍ചാണ്ടി ഒരു പേരിനു മാത്രമുള്ള മുഖ്യ മന്ത്രിയാണ്. അതിനാല്‍ സാങ്കേതികമായി അദ്ദേഹമാണ് മുഖ്യമന്ത്രി. എന്നാല്‍ നാല് അധികാര കേന്ദ്രങ്ങളാണ് സംസ്ഥാനത്തെ ഭരിക്കുന്നതെന്ന് വെള്ളാപ്പള്ളി ആരോപിച്ചു. ദേവസ്വം മന്ത്രി ശിവകുമാര്‍ തമ്പുരാക്കന്‍മാരുടെ താല്‍പര്യം സംരക്ഷിക്കാനാണ് ദേവസ്വം റിക്രൂട്ട്മെന്‍്റ് ബോര്‍ഡ് എന്ന ആശയവുമായി വരുന്നതെന്നും എന്‍. എസ്. എസിന്‍്റെ നോമിനിയായ അദ്ദേഹത്തില്‍ നിന്നും മറിച്ചൊന്നും പ്രതീക്ഷിക്കുന്നില്ലെന്നും വെള്ളാപ്പള്ളി പറഞ്ഞു. രാഷ്ട്രീയം കളിക്കാനറിയാമെന്ന് പറയുന്ന ചങ്ങനാശ്ശേരി നേതാവ് ഒറ്റക്ക് മല്‍സരിക്കാന്‍ തയ്യാറുണ്ടോ എന്ന് വെള്ളാപ്പള്ളി വെല്ലുവിളിച്ചു. കൊല്ലം മുണ്ടക്കല്‍ എസ്. എന്‍. ഡി. പി ശാഖയുടെ ഗുരുമന്ദിര സമര്‍പ്പണം നിര്‍വഹിച്ച് സംസാരിക്കുകയായിരുന്നു അദ്ദേഹം.

തിരുവനന്തപുരം:യേശുവിന്റെ ജീവിതം തങ്ങള്‍ക്ക് വഴികാട്ടിയാണെന്നും വ്യവസ്ഥയെ വെല്ലുവിളിച്ച വിമോചനനായകനാണ് യേശു ക്രിസ്തുവെന്നും  പ്രതിപക്ഷ നേതാവ് വി എസ് അച്യുതാനന്ദന്‍. യേശു മാത്രമല്ല, ബുദ്ധനും നബിയുമൊക്കെ വിമോചന നായകരില്‍പ്പെടും. മതങ്ങളെയല്ല മത തീവ്രവാദത്തെയാണ് സിപിഎം എതിര്‍ക്കുന്നത്. എന്നാല്‍ യേശുവിന്റെ പോസ്റ്റര്‍ വെച്ചത് പാര്‍ട്ടി പ്രചാരണത്തിനല്ല ഇക്കാര്യത്തില്‍ അഭിനന്ദിക്കുന്നതിന് പകരം അധിക്ഷേപിക്കുകയാണ് കെ.പി.സി.സി പ്രസിഡന്റ് രമേശ്‌ ചെന്നിത്തല യടക്കമുള്ള കോണ്ഗ്രസ്സ് നേതാക്കള്‍ ചെയ്യുന്നതെന്നും വി എസ് പറഞ്ഞു.