തിരുവനന്തപുരം : മുഖ്യമന്ത്രി വി. എസ്. അച്യുതാനന്ദന്റെ വിശ്വസ്തനായിരുന്ന കെ. എം. ഷാജഹാന് ഓണ്ലൈന് ന്യൂസ് പോര്ട്ടല് തുടങ്ങുന്നു. അദര്കേരള ഡോട്ട് ഇന് എന്ന ഈ പോര്ട്ടല് മറ്റാരും പറയാന് മടിക്കുന്ന സത്യങ്ങള് പലതും തുറന്നു പറയും എന്ന് പറയുന്ന ഇദ്ദേഹം ഒന്ന് രണ്ടാഴ്ച്ച കള്ക്കുള്ളില് പോര്ട്ടല് പ്രവര്ത്തനം ആരംഭിക്കും എന്നും പറയുന്നു.
പ്രതിപക്ഷ നേതാവായിരുന്ന കാലത്ത് വി. എസ്. അച്യുതാനന്ദന് ജന പ്രിയ നേതാവായതിനു പുറകിലെ പ്രധാന ബുദ്ധി കേന്ദ്രങ്ങളില് ഒരാളായിരുന്നു കെ. എം. ഷാജഹാന് എന്നാണ് കരുതപ്പെടുന്നത്. വി. എസ്. അക്കാലത്ത് ഏറ്റെടുത്ത ജനകീയ പ്രശ്നങ്ങള് ഇദ്ദേഹമായിരുന്നു വി. എസിന്റെ ശ്രദ്ധയില് കൊണ്ട് വന്നത് എന്ന് പറയപ്പെടുന്നു.
എന്നാല് പിന്നീട് വി. എസുമായി അഭിപ്രായ ഭിന്നതയുണ്ടായ ഇദ്ദേഹം പാര്ട്ടിയില് നിന്നും അകലുകയും പാര്ട്ടിക്ക് പുറത്താവുകയും ചെയ്തു.
താന് തുടരുന്ന പോരാട്ടം ശക്തിപൂര്വ്വം മുന്നോട്ട് കൊണ്ട് പോകാനാണ് താന് ന്യൂസ് പോര്ട്ടല് തുടങ്ങുന്നത് എന്ന് ഷാജഹാന് വ്യക്തമാക്കുന്നു. വരും കാലത്തിന്റെ മാധ്യമം വെബ് തന്നെയാണ് എന്ന് താന് മനസ്സിലാക്കുന്നു. ആര്ക്കും അവഗണിക്കാന് ആവാത്ത ശക്തിയായി ഓണ്ലൈന് മാധ്യമം മാറുകയാണ്. ഓണ്ലൈന് മാധ്യമങ്ങളെ അംഗീകരിക്കാന് തയ്യാറാവാതെ പുറം തിരിഞ്ഞു നില്ക്കാന് ശ്രമിക്കുന്ന ചില “താപ്പാനകള്” മാധ്യമ രംഗത്ത് വിഹരിക്കുന്നുണ്ട്. ഇവര് മൂഢ സ്വര്ഗ്ഗത്തിലാണ് കഴിയുന്നത്. ഓണ്ലൈന് മാധ്യമത്തിന്റെ അപാരമായ സാദ്ധ്യത മനസ്സിലാക്കിയാണ് താന് ന്യൂസ് പോര്ട്ടല് എന്ന ആശയത്തില് എത്തിയത് എന്നും അദ്ദേഹം പറഞ്ഞു.
കാസര്ഗോഡ് : പര്ദ്ദ ധരിക്കാതെ നടന്നതിനു കാസര്ഗോഡ് സ്വദേശിനി റയാനയ്ക്ക് മൌലികവാദി കളുടെ വധ ഭീഷണി. ഈ മാസം 26 നുള്ളില് പര്ദ്ദ ധരിച്ചു തുടങ്ങിയില്ലെങ്കില് മറ്റുള്ളവര്ക്ക് കൂടി മാതൃക ആവുന്ന വിധം റയാനയുടെ വധ ശിക്ഷ നടപ്പിലാക്കും എന്നാണു ഭീഷണി. കുറേ നാളായി റയാനയ്ക്ക് ഇത്തരം ഭീഷണി എഴുത്തുകള് വഴി വരുന്നുണ്ട്. ആദ്യമൊക്കെ പോലീസ് കേസെടുക്കാന് വിമുഖത കാണിച്ചെങ്കിലും റയാന ഹൈക്കോടതിയെ സമീപിക്കുകയും ഹൈക്കോടതിയുടെ നിര്ദ്ദേശ പ്രകാരം പോലീസ് കേസെടുക്കുകയും ചെയ്തു. അന്വേഷണം നടത്തിയ പോലീസ് 4 പേരെ അറസ്റ്റ് ചെയ്തിട്ടുണ്ട്. ഇതില് ഒരാള് പോപ്പുലര് ഫ്രണ്ട് പ്രവര്ത്തകനാണെന്ന് സംശയിക്കപ്പെടുന്നു.
തൃശൂര് : പൂര നഗരിയിലെ പ്രദക്ഷിണ വഴിയില് പുലികള് ചെണ്ടയുടെ താളത്തില് ചുവടു വെച്ചപ്പോള് നാടും നഗരവും അവിടേക്ക് ഒഴുകിയെത്തി. മെയ്യെഴുത്തിന്റേയും അലങ്കാരങ്ങളുടേയും പുള്ളിയും വരയുമായി നൂറു കണക്കിനു പുലികള് ആണ് ഇന്നലെ സന്ധ്യക്ക് നഗരത്തില് ഇറങ്ങിയത്. നടുവിലാലില് ഗണപതിയ്ക്ക് നാളികേരം ഉടച്ച് ചുവടു വെയ്ക്കാന് ആദ്യം എത്തിയത് കാനാട്ടുകര സംഘമായിരുന്നു. ആര്പ്പും വിളിയുമായി കാണികള് അവരെ വരവേറ്റു. പിന്നെ വെളിയന്നൂര് സംഘത്തിന്റെ ഊഴമായി. അവരും ആവേശം പകരുന്ന ചുവടുകളുമായി മുന്നേറി. മഴയുടെ ചെറിയ ശല്യം ഉണ്ടയിരുന്നുവെങ്കിലും പുലി കളിയുടെ താളം മുറുകിയപ്പോള് ആവേശം മൂത്ത് അവര്ക്കൊപ്പം ആസ്വാദകരും കൂടി. കീരം കുളങ്ങരയും, ചക്കാമുക്കും, തൃക്കുമാരം കുടവും, വിയ്യൂരും, വെളിയന്നൂരും, സീതാറാം മില്ലും, പൂങ്കുന്നം സെന്ററും, പെരിങ്ങാവും, കാനാട്ടുകരയും എല്ലാമായി പത്തോളം പുലി സംഘങ്ങള് പങ്കെടുത്തു.
തിരുവനന്തപുരം : ഉത്രാട നാളില് മാത്രം കേരളത്തില് വിറ്റത് 30 കോടി രൂപയുടെ മദ്യം. 24 ലക്ഷം രൂപയുടെ മദ്യം വിറ്റ് ചാലക്കുടി ബീവറേജസ് മദ്യ വില്പ്പന ശാല വില്പ്പനയില് ഒന്നാം സ്ഥാനത്ത് എത്തി. കഴിഞ്ഞ 6 ദിവസത്തില് കേരളത്തില് വിറ്റഴിഞ്ഞത് 155.61 കോടി രൂപയുടെ മദ്യമാണ്.
