 |
 |
 |
 |
 |
 |
 |
 |
 |
 |
 |
 |
 |
 |
സൂറിച്ച് : 2014 ലോക കപ്പ് ഫുട്ബോള് ടൂര്ണമെന്റിന്റെ ഫൈനല് മല്സരം റിയോ ഡി ജനെയ്റോവില് ആവുമെന്ന് ഫിഫ അറിയിച്ചു. ആദ്യ മല്സരം സാവോ പോളോയില് ആയിരിക്കും അരങ്ങേറുക. സെമി ഫൈനല് മല്സരങ്ങള് സാവോ പോളോയിലും ബെലോ ഹോറിസോണ്ടെയിലും ആയിരിക്കും നടക്കുക എന്നും ഫിഫ വെളിപ്പെടുത്തി.
- ജെ.എസ്.
ട്രിപോളി : സിര്തെയില് നടന്ന കടുത്ത യുദ്ധത്തിനൊടുവില് ലിബിയന് നേതാവ് മുഅമ്മാര് ഗദ്ദാഫിയെ തങ്ങള് വധിച്ചു എന്ന് വിമത സൈന്യം അവകാശപ്പെട്ടു. കൊല്ലപ്പെട്ട ഗദ്ദാഫിയുടെ രക്തം ഒളിക്കുന്ന തലയുമായുള്ള ഫോട്ടോ സൈന്യം പുറത്തു വിട്ടു. തലയ്ക്ക് വെടിയേറ്റാണ് ഗദ്ദാഫി കൊല്ലപ്പെട്ടത് എന്നാണ് സൂചന. ഇതോടെ “അറബ് വസന്തത്തില്” കടപുഴകുന്ന അധികാര കേന്ദ്രങ്ങളില് ഏറ്റവും പ്രമുഖമാവും ഈ സംഭവ വികാസം. 42 വര്ഷക്കാലം ലിബിയ ഭരിച്ച ഏകാധിപതി ആയിരുന്നു ഗദ്ദാഫി.
- ജെ.എസ്.
ബെര്ലിന് : ഒരു ഉപഗ്രഹ വിപത്തില് നിന്നും ലോകം കഷ്ടിച്ച് രക്ഷപ്പെട്ടിട്ട് ഒരു മാസം പോലും തികയുന്നതിന് മുന്പ് ഇതാ വീണ്ടുമൊരു ഉപഗ്രഹ ഭീഷണി. ഇത്തവണ ഭൂമിയിലേക്ക് അതിവേഗത്തില് വീണു കൊണ്ടിരിക്കുന്നത് ജെര്മ്മന് ഉപഗ്രഹമായ റോസാറ്റ് ആണ്. ഇത് നാളെ (വെള്ളിയാഴ്ച) മുതല് തിങ്കളാഴ്ച വരെയുള്ള കാലയളവില് എപ്പോള് വേണമെങ്കിലും ഭൂമിയില് പതിക്കും എന്നാണ് ജെര്മ്മന് എയറോസ്പേസ് സെന്റര് അറിയിക്കുന്നത്.
മുകളിലേക്ക് തൊടുത്തു വിടുമ്പോള് സാദ്ധ്യമാവുന്ന കൃത്യത പക്ഷെ ഉപയോഗശേഷം ഉപഗ്രഹം തിരികെ വരുമ്പോള് അത് എവിടെ പതിക്കും എന്ന കാര്യത്തില് പോലും പ്രവചിക്കാന് ശാസ്ത്രജ്ഞര്ക്ക് കഴിയുന്നില്ല എന്നത് വീണ്ടും തെളിയിക്കുകയാണ് റോസാറ്റ്. ഒരു മിനി വാനിന്റെ വലിപ്പമുള്ള ഈ ഉപഗ്രഹം മിക്കവാറും ഭൂമിയുടെ അന്തരീക്ഷത്തില് പ്രവേശിക്കുന്നതോടെ വായുവുമായുള്ള ഘര്ഷണത്തില് കത്തി തീരും. എന്നാലും ഏതാണ്ട് 30 കഷണങ്ങള് എങ്കിലും ബാക്കി വരാം എന്നും ഇത് ഭൂമിയില് പതിക്കും എന്നുമാണ് കണക്ക് കൂട്ടല്. ഇതിന്റെ ഭാരം 2 ടണ്ണോളം വരും. ഇത് എവിടെയാവും വീഴുക എന്നത് ഇനിയും വ്യക്തമല്ല.
1990ല് വിക്ഷേപിച്ച ഈ ഉപഗ്രഹം 1990ല് പ്രവര്ത്തനരഹിതമായി. ശാസ്ത്രീയ പഠനങ്ങള് നടത്തുവാനായി ജെര്മ്മനി വിക്ഷേപിച്ചതാണ് ഈ കൃത്രിമ ഉപഗ്രഹം.
കഴിഞ്ഞ മാസം നാസയുടെ ഒരു ഉപഗ്രഹം ഭൂമിയില് പതിച്ചിരുന്നു. അന്ന് ഭാഗ്യവശാല് ഉപഗ്രഹ അവശിഷ്ടങ്ങള് ശാന്ത സമുദ്രത്തില് പതിച്ചതിനാല് ആളപായം ഉണ്ടായതായി റിപ്പോര്ട്ട് ചെയ്യപ്പെട്ടില്ല.
- ജെ.എസ്.
- ലിജി അരുണ്
ലണ്ടന് : ആഗോള സാമ്പത്തിക മാന്ദ്യത്തിന് കാരണമായ കോര്പ്പൊറേറ്റ് അത്യാഗ്രഹത്തിനും ബാങ്കര്മാരുടെ അതിമോഹത്തിനും തെറ്റായ സര്ക്കാര് നയങ്ങള്ക്കും വിലക്കയറ്റത്തിനും എതിരെ ആഗോള വ്യാപകമായ പ്രതിഷേധത്തിന് ആഹ്വാനം നല്കിയ ഒരു ഫേസ്ബുക്ക് പ്രതിഷേധത്തിന് ലോകമെമ്പാടും നിന്നും വമ്പിച്ച പ്രതികരണമാണ് ഇന്നലെ ലഭിച്ചത്. Occupy Wall Street എന്ന പേരില് അറിയപ്പെട്ട ഈ പ്രതിഷേധ പ്രകടനത്തില് 82 ലോക രാഷ്ട്രങ്ങളില് നിന്നുമുള്ള ആളുകള് പങ്കെടുത്തു. പ്രതിഷേധ പ്രകടനങ്ങളില് പങ്കെടുത്ത ആയിരങ്ങള് അറസ്റ്റിലായി. പല ഇടങ്ങളിലും ചെറു സംഘങ്ങളാണ് പ്രകടനത്തില് പങ്കെടുത്തത്. എന്നാല് റോമാ നഗരത്തില് പതിനായിരക്കണക്കിന് ആളുകളാണ് പ്രതിഷേധിക്കാന് സംഘടിച്ചത്. ഇത് വന് ക്രമസമാധാന പ്രശ്നങ്ങള്ക്കും കാരണമായി. കാറുകള്ക്ക് തീയിട്ടും, ബാങ്കുകള് അടിച്ചു തകര്ത്തും, പടക്കങ്ങളും കുപ്പികളും വലിച്ചെറിഞ്ഞും മുന്നേറിയ ജനക്കൂട്ടത്തിനെ പോലീസ് ജല പീരങ്കികള് കൊണ്ട് നേരിട്ടു.
ന്യൂസീലാന്ഡിലെ ഓക്ക് ലാന്ഡില് മൂവായിരത്തോളം പേര് ചെണ്ട കൊട്ടി പ്രതിഷേധിച്ചു. ഓസ്ട്രേലിയയിലെ സിഡ്നിയില് തദ്ദേശീയരായ അബോറിജിന് വംശജര് അടക്കം ഓസ്ട്രേലിയന് റിസര്വ് ബാങ്കിന് പുറത്തു നടന്ന പ്രതിഷേധത്തില് പങ്കെടുത്തു. ജപ്പാനിലെ ടോക്യോയില് ആണവോര്ജ വിരുദ്ധ പ്രകടനക്കാര് വോള് സ്ട്രീറ്റ് പ്രക്ഷോഭത്തില് പങ്കെടുത്തത് വ്യത്യസ്തമായ അനുഭവമായി. ഫിലിപ്പൈന്സിലെ മാനിലയില് “അമേരിക്കന് സാമ്രാജ്യത്വം തുലയട്ടെ” എന്നും “ഫിലിപ്പൈന്സ് വില്പ്പനയ്ക്കല്ല” എന്നുമുള്ള ബോര്ഡുകള് ഏന്തിയാണ് പ്രകടനക്കാര് അമേരിക്കന് എംബസിക്ക് മുന്പില് എത്തിയത്. തായ്വാനിലെ തായ്പേയില് സാമ്പത്തിക വളര്ച്ച വന്കിട കോര്പ്പൊറേറ്റ് കമ്പനികളെ മാത്രമാണ് സഹായിച്ചത് എന്ന് പ്രകടനക്കാര് മുദ്രാവാക്യം മുഴക്കി. ബാങ്ക് ഓഫ് ഇറ്റലിക്ക് മുന്പില് പ്രതിഷേധ പ്രകടനം തുടങ്ങിയിട്ട് നാളുകള് ഏറെയായി. ജര്മ്മനിയിലെ ഒട്ടേറെ നഗരങ്ങള്, മാഡ്രിഡ്, സൂറിച്ച്, ഏതെന്സ് എന്നിങ്ങനെ ഒട്ടേറെ യൂറോപ്യന് നഗരങ്ങളിലെ ജനങ്ങളും പ്രതിഷേധ പ്രകടനങ്ങള് സംഘടിപ്പിച്ചു. ലണ്ടനില് നടന്ന പ്രകടനത്തില് വിക്കിലീക്ക്സ് സ്ഥാപകന് ജൂലിയന് അസ്സാന്ജെ പ്രകടനക്കാരെ അഭിസംബോധന ചെയ്തു സംസാരിച്ചു.
- ജെ.എസ്.
വായിക്കുക: ക്രമസമാധാനം, പ്രതിഷേധം, സാമ്പത്തികം
ന്യൂയോര്ക്ക് : മദ്ധ്യ പൂര്വ ഏഷ്യന് രാജ്യങ്ങളില് അലയടിച്ച വിപ്ലവത്തിന്റെ കാറ്റില് പറന്നു പോയത് 55 ബില്യന് ഡോളര് എന്ന് കണ്ടെത്തല്. അള്ജീരിയ, ടുണീഷ്യ, യെമന്, ബഹറൈന്, ഈജിപ്ത്, ലിബിയ, സിറിയ എന്നിങ്ങനെ ഒട്ടേറെ രാജ്യങ്ങളില് ഈ ജനാധിപത്യ അനുകൂല പ്രക്ഷോഭം അരങ്ങേറിയിരുന്നു. ഐ. എം. എഫ്. നടത്തിയ ഒരു പഠനത്തില് ആണ് ഇത് വെളിപ്പെട്ടത്. എന്നാല് ഇത് മൂലം പൊടുന്നനെ ഉയര്ന്ന എണ്ണ വില പ്രക്ഷോഭം കാര്യമായി ബാധിക്കാഞ്ഞ കുവൈത്ത്, യു. എ. ഇ., സൗദി അറേബ്യ എന്നീ എണ്ണ ഉല്പ്പാദക രാജ്യങ്ങള്ക്ക് അനുകൂലമായി ഭാവിച്ചു എന്നും പഠനം സൂചിപ്പിച്ചു.
- ജെ.എസ്.
വായിക്കുക: പീഡനം, പോലീസ്, പ്രതിഷേധം, മനുഷ്യാവകാശം, സാമ്പത്തികം
ന്യൂയോര്ക്ക് : ജെറുസലേമില് വീണ്ടും പുതിയ വീടുകള് നിര്മ്മിച്ച് കുടിയേറ്റം നടത്താന് നടത്തുന്ന ഇസ്രയേലിന്റെ പദ്ധതികളെ അംഗീകരിക്കാന് ആവില്ലെന്ന് ഐക്യരാഷ്ട്രസഭ വ്യക്തമാക്കി. 2600 പുതിയ വീടുകള് നിര്മ്മിക്കാനാണ് ഇസ്രയേലിന്റെ പദ്ധതി. എന്നാല് സമാധാനത്തിനായി നടക്കുന്ന ചര്ച്ചകള്ക്ക് കടക വിരുദ്ധമാണ് ഈ നടപടി എന്നാണ് ഐക്യരാഷ്ട്രസഭയുടെ നിലപാട്. ഇത്തരം എല്ലാ നിര്മ്മാണ പ്രവര്ത്തനങ്ങളും ഉടനടി നിര്ത്തലാക്കാതെ സമാധാന ചര്ച്ചകള് തുടരാന് ആവില്ല എന്നാണ് പലസ്തീന്കാര് പറയുന്നത്.
- ജെ.എസ്.
വായിക്കുക: ഇസ്രായേല്, ഐക്യരാഷ്ട്രസഭ, പലസ്തീന്, യുദ്ധം
ജെറുസലേം : തങ്ങളുടെ ഒരു പോരാളിക്ക് പകരമായി ഇസ്രായേല് 1027 പലസ്തീന് പോരാളികളെ വിട്ടയക്കാന് തീരുമാനിച്ചു. മൂന്നിനെതിരെ ഇരുപത്തിയാറ് വോട്ടുകള്ക്കാണ് ഇസ്രയേലി മന്ത്രിസഭ ഈ തീരുമാനം പാസാക്കിയത്. അഞ്ചു വര്ഷം മുന്പ് ഹമാസ് പിടികൂടിയ സാര്ജെന്റ്റ് ഗിലാദ് ഷാലിറ്റിനെ തിരികെ ലഭിക്കാനാണ് തങ്ങള്ക്ക് ഭീഷണി ആണെന്ന് അറിഞ്ഞിട്ടും 1027 ഹമാസ് പോരാളികളെ വിട്ടയയ്ക്കാന് ഇസ്രായേല് മന്ത്രിസഭ തീരുമാനിച്ചത്. ഈ തീരുമാനത്തിന് എതിരെ വോട്ടു ചെയ്ത മന്ത്രിമാര് ഈ തീരുമാനം ഭീകരതയുടെ വന് വിജയമാണ് എന്ന് അഭിപ്രായപ്പെട്ടു. ഇനിയും തങ്ങളുടെ പോരാളികളെ പിടികൂടുവാനും ഇത് പോലെ വിലപേശുവാനും ഇത് ഹമാസിന് പ്രചോദനം ആവും എന്ന് ഇവര് ചൂണ്ടിക്കാട്ടി.
സ്വതന്ത്രരാവുന്ന തങ്ങളുടെ പോരാളികള് വീണ്ടും പോരിനിറങ്ങും എന്ന് സിറിയയില് കഴിയുന്ന ഹമാസ് നേതാവ് ഖാലെദ് മാഷാല് പ്രഖ്യാപിച്ചത് ഇസ്രയേലിന്റെ ഭീതിക്ക് ആക്കം കൂട്ടുന്നു.
- ജെ.എസ്.
വായിക്കുക: ഇസ്രായേല്, പലസ്തീന്, യുദ്ധം
തിംഫു : ഭൂട്ടാന് രാജാവ് ജിഗ്മേ ഖേസര് നംഗ്യേല് വാംഗ്ഷുക്കിന്റെ വിവാഹം നാളെ നടക്കും. 31 കാരനായ രാജാവ് 21 കാരിയായ ജെറ്റ്സണ് പേമയെ നാളെ രാവിലെ പുനാഖയിലെ “അത്യാഹ്ലാദ കൊട്ടാര” ത്തില് വെച്ചാണ് പരമ്പരാഗത ചടങ്ങുകളോടെ വിവാഹം കഴിക്കുക. ഓക്സ്ഫോര്ഡ് ബിരുദ ധാരിയായ രാജാവ് ഇന്ത്യയിലും ബ്രിട്ടനിലുമായാണ് തന്റെ വിദ്യാഭ്യാസം പൂര്ത്തിയാക്കിയത്. 2008 നവമ്പറില് രാജാവായി സ്ഥാനമേറ്റ അദ്ദേഹം രാജ്യത്തെ ജനാധിപത്യത്തിലേക്ക് നയിച്ചു കൊണ്ട് ചരിത്രത്തില് സ്ഥിര പ്രതിഷ്ഠ നേടി. ഇന്ത്യയിലെ നെഹ്റു കുടുംബവുമായി നല്ല ബന്ധം പുലര്ത്തുന്ന രാജ കുടുംബത്തിലെ ഈ അപൂര്വ വിവാഹത്തില് പങ്കെടുക്കാന് രാഹുല് ഗാന്ധി എത്തും എന്നാണ് കരുതപ്പെടുന്നത്.
- ജെ.എസ്.
വായിക്കുക: ഇന്ത്യ, ബഹുമതി, ബ്രിട്ടന്, ഭൂട്ടാന്, മനുഷ്യാവകാശം
വാഷിംഗ്ടണ് : അമേരിക്കയിലെ സാമ്പത്തിക തലസ്ഥാനമെന്ന് അറിയപ്പെടുന്ന വാള്സ്ട്രീറ്റില് ഒരു സംഘം യുവാക്കള് ആരംഭിച്ച സര്ക്കാര് വിരുദ്ധ പ്രക്ഷോഭം അതിവേഗം പടരുന്നു. സര്ക്കാരിന്റെ സാമ്പത്തിക നയങ്ങള്ക്കും രാജ്യത്തെ തൊഴിലില്ലായ്മ പട്ടിണി എന്നിവയ്ക്കും എതിരായ പ്രക്ഷോഭം മറ്റു നഗരങ്ങളിലേക്കും വ്യാപിച്ചു തുടങ്ങി. കുത്തകകളെ സംരക്ഷിക്കുന്ന നിലപാട് മൂലം രാജ്യത്ത് അസന്തുലിതാവസ്ഥ ഉയരുകയാണെന്നും സമരം വിജയിച്ചേ തങ്ങള് പിന്മാറൂ എന്നുമാണ് വാള്സ്ട്രീറ്റില് തമ്പടിച്ചിരിക്കുന്ന പ്രക്ഷോഭകാരികള് പറയുന്നത്.
ഫ്ലോറിഡ, വാഷിംഗ്ടണ് സിറ്റി തുടങ്ങി എഴുപതിലേറെ പ്രമുഖ നഗരങ്ങളില് ഇതിനോടകം പടര്ന്നു കഴിഞ്ഞ പ്രക്ഷോഭത്തില് ആയിരക്കണക്കിനു പേര് അണി നിരക്കുവാന് തുടങ്ങിയിരിക്കുന്നു. നോബല് പുരസ്കാര ജേതാവ് പോള് ക്രൂഗ്മാനെ പോലുള്ള പ്രമുഖരടക്കം സമൂഹത്തിന്റെ വിവിധ തുറകളില് നിന്നുമുള്ളവര് സമരത്തിനു പിന്തുണ പ്രഖ്യാപിച്ചിട്ടുണ്ട്. ഇതിനോടകം 21 ദിവസം പിന്നിട്ട പ്രക്ഷോഭം അമേരിക്കന് സര്ക്കാരിനു തലവേദന ആയിട്ടുണ്ട്. വാഷിംഗ്ടണിലെ പ്രസിദ്ധമായ വ്യോമ ബഹിരാകാശ മ്യൂസിയത്തിലേക്ക് കഴിഞ്ഞ ദിവസം പ്രക്ഷോഭകാരികള് ഇരച്ചു കയറുവാന് ശ്രമിച്ചിരുന്നു. തുടര്ന്ന് പ്രക്ഷോഭകാരികള്ക്ക് നേരെ പോലീസ് മുളകു പൊടി സ്പ്രേ പ്രയോഗിച്ചു.
സാധാരണക്കാരുടെ നികുതിപ്പണം കൊണ്ട് കുത്തകകളെ സംരക്ഷിക്കു വാനായാണ് സര്ക്കാര് ശ്രമിക്കുന്നതെന്നും ഇത് രാജ്യത്ത് തൊഴിലില്ലായമയും പട്ടിണിയും വര്ദ്ധിപ്പിക്കുവാന് ഇടയാക്കുന്നു എന്നുമാണ് പ്രക്ഷോഭകാരികള് ആരോപിക്കുന്നത്. സാമ്പത്തിക പ്രതിസന്ധിയെ തുടര്ന്ന് തൊഴില്ലായ്മ രൂക്ഷമായ അമേരിക്കയില് ആറിലൊരാള് ദരിദ്രനാണെന്ന റിപ്പോര്ട്ടുകള് അടുത്ത കാലത്ത് പുറത്തു വന്നിരുന്നു. ഇന്റര്നെറ്റിലും പ്രക്ഷോഭകാരികള്ക്ക് അനുദിനം പിന്തുണ ഏറിക്കൊണ്ടിരിക്കുകയാണ്. മാധ്യമ രാജാവ് റൂപ്പര്ട്ട് മര്ഡോക്കിന്റെ “വാള്സ്ട്രീറ്റ് ജേണലിന്റെ” പേരിനോട് സാമ്യമുള്ള “ഒക്യുപൈ വാള്സ്ട്രീറ്റ് ജേണല്” എന്ന പേരില് ഒരു പത്രം പ്രക്ഷോഭകാരികള് പുറത്തിറക്കുവാന് ആരംഭിച്ചിട്ടുണ്ട്. സമരം ശക്തമായാല് അത് വരാനിരിക്കുന്ന അമേരിക്കന് പ്രസിഡണ്ട് തിരഞ്ഞെടുപ്പില് ഒബാമ ഭരണകൂടത്തിന് വലിയ വെല്ലുവിളി ആയിരിക്കും ഉയര്ത്തുക.
- എസ്. കുമാര്
വായിക്കുക: അമേരിക്ക, പ്രതിഷേധം, മനുഷ്യാവകാശം, സാമ്പത്തികം
വാര്ത്തകള് കേരളം
|
കലാ സാഹിത്യം ലേഖനങ്ങള്
മഞ്ഞ (മാഗസിന്) |
കോളംസ് പള്സ്
പച്ച (പരിസ്ഥിതി) |
മറ്റ് പംക്തികള് ചരമം |
