വാളയാര്‍: വാളയാര്‍ അതിര്‍ത്തിയില്‍ കാട്ടാനയുടെ ആക്രമണത്തില്‍ തമിഴ്‌നാട്ടിലെ ഫോറസ്റ്റ് വാച്ചര്‍ മരിച്ചു. ചെന്നൈ സ്വദേശി നടേശന്‍ (53) ആണ് മരിച്ചത്. കൂടെയുണ്ടായിരുന്ന  ചന്ദ്രശേഖരന്‍ എന്ന ഫോറസ്റ്റ് ഗാര്‍ഡിന് ഗുരുതരമായി പരിക്കേറ്റിട്ടുണ്ട്. ഇയാളെ കോയമ്പത്തൂരിലെ ഒരു സ്വകാര്യ ആശുപത്രിയില്‍ പ്രവേശിപ്പിച്ചു.
കഴിഞ്ഞ ഞായറാഴ്ചയാണ് വാളയാര്‍ അതിര്‍ത്തിയിലെ വനത്തിലൂടെ കടന്നു പോകുന്ന റെയില്‍‌വേ ട്രാക്കിലൂടെ പതിവു നിരീക്ഷണത്തിനായി വനം വകുപ്പ് ജീവനക്കാര്‍ എത്തിയത്. ഈ സമയത്ത് ട്രാക്കിനു സമീപത്തു നില്‍ക്കുകയായിരുന്ന ആനയുടെ മുമ്പില്‍ ഇവര്‍ അകപ്പെടുകയായിരുന്നു. ആനയുടെ മുമ്പില്‍ നിന്നും ഓടിരക്ഷപ്പെടുവാന്‍ ശ്രമിച്ച ഇരുവരേയും ആന ആക്രമിച്ചു. നടേശനെ തുമ്പികൊണ്ട് അടിച്ചു വീഴ്ത്തി ചവിട്ടുകയായിരുന്നു. ഇയാള്‍ സംഭവസ്ഥലത്തു വച്ചുതന്നെ മരിച്ചു. തുടര്‍ന്ന് ആന ചന്ദ്രശേഖറിനെയും ആക്രമിച്ചു.  പരിക്കേറ്റ ചന്ദ്രശേഖരന്‍ ഫോണ്‍ചെയ്ത് വിവരം അറിയിച്ചതിനെ തുടര്‍ന്ന് വനം വകുപ്പ് ഉദ്യോഗസ്ഥര്‍ എത്തിയാണ് ഇയാളെ ആശുപത്രിയില്‍ എത്തിച്ചത്.

അയിരൂര്‍: തടി പിടിക്കുന്നതിനിടയില്‍ പിടിയാന മൂന്നാം പാപ്പാനെ ചവിട്ടിക്കൊന്നു. എരുമേലി സ്വദേശി ജലാലുദ്ദീന്റെ സംരക്ഷണയിലുള്ള ലക്ഷ്മി എന്ന ആനയാണ് പാപ്പാന്‍ മണിമല സ്വദേശി സജിയെ (36) ചവിട്ടിക്കൊന്നത്. തടി പിടിക്കുന്നതിനിടയില്‍ ആന സജിയെ തുമ്പി കൊണ്ട് തട്ടി വീഴ്ത്തുകയായിരുന്നു. മുകളില്‍ ഇരുന്ന രണ്ടാം പാപ്പാന്‍ ആനയെ പിന്തിരിപ്പിക്കുവാന്‍ ശ്രമിച്ചെങ്കിലും നിലത്തു വീണ സജിയെ ചവിട്ടി പരിക്കേല്പി ക്കുകയായിരുന്നു. ആനയെ ഉടനെ സംഭവ സ്ഥലത്തു നിന്നും മാറ്റി തളച്ചുവെങ്കിലും, സജിയുടെ ജീവന്‍ രക്ഷിക്കുവാനായില്ല.

സുലേഖയാണ് സജിയുടെ ഭാര്യ. സുചിത്ര, സൂരജ് എന്നിവര്‍ മക്കളാണ്.

കൊല്ലം: ഗംഗാപ്രസാദ് എന്ന ആനയെ കൊല്ലത്തിനടുത്ത് നാട്ടുകാര്‍ “ബന്ധിയാക്കി”.  പ്രദേശത്തെ വലിയ ഒരു തോടിനു കുറുകെ കടക്കുവാനുള്ള ഏക പാലം തകര്‍ന്നത്  ശ്രദ്ധയില്‍ പെട്ടതിനെ തുടര്‍ന്ന് നടത്തിയ അന്വേഷണത്തില്‍ അതിനു കാരണം ആനയാണെന്ന് കണ്ടെത്തുകയായിരുന്നു. ദുര്‍ബലമായ ഒരു പാലത്തിലൂടെ ആനയെ നടത്തിയതിനെ തുടര്‍ന്നാണ് പൊളിഞ്ഞു വീണതെന്ന് മനസ്സിലായ നാട്ടുകാര്‍ ആനയെയും പാപ്പാന്മാരെയും തടഞ്ഞു വെക്കുകയായിരുന്നു.  ഉടമയെത്തി പുതിയ പാലം നിര്‍മ്മിച്ചു നല്‍കാമെന്ന ഉറപ്പു നല്‍കിയതിനെ തുടര്‍ന്നായിരുന്നു ആനയെ വിട്ടു നല്‍കിയത്. ആനയ്ക്കു വേണ്ട ഭക്ഷണം നല്‍കുവാന്‍ “ബന്ധികള്‍” പ്രത്യേകം ശ്രദ്ധിച്ചിരുന്നു.

തൃശൂര്‍ : ഉടമ ഉപേക്ഷിച്ച നിലയില്‍ കണ്ടെത്തിയ ചൂരൂര്‍ മഠത്തില്‍ വല്ലഭദാസ് എന്ന ആനയെ നാട്ടുകാരും ഫോറസ്റ്റ് ഉദ്യോഗസ്ഥരും ചേര്‍ന്ന് രക്ഷപ്പെടുത്തി. ദിവസങ്ങളായി ആനയ്ക്ക് ആഹാരമോ വെള്ളമോ നല്‍കാതെ ആനയെ വഴിയരികില്‍ കെട്ടിയിട്ടിരി ക്കുകയായിരുന്നു. മഴ വെള്ളം കെട്ടി കിടക്കുന്നതിനാല്‍ ആനയുടെ കാലുകള്‍ ചളിയില്‍ പൂണ്ട നിലയിലാണ്. പിന്‍‌കാലുകളില്‍ ചങ്ങലയുരഞ്ഞ് പഴുത്തിട്ടുണ്ട്. പുഴുവരിക്കുവാന്‍ തുടങ്ങിയിരിക്കുന്ന വ്രണങ്ങളില്‍ നിന്നും പഴുപ്പ് ഒലിച്ചിറങ്ങുകയും ചെയ്യുന്നുണ്ട്. കാല്‍‌ നഖങ്ങളിലെ പഴുപ്പു മൂലം ആനയ്ക്ക് കാല്‍ നിലത്തുറപ്പിച്ച് നില്‍ക്കുമ്പോള്‍ അസഹ്യമായ വേദന അനുഭവപ്പെടുന്നുണ്ട്.

പ്രായമായതിനാലാണ് ഉടമ ആനയെ വേണ്ട രീതിയില്‍ സംരക്ഷിക്കുവാന്‍ തയ്യാറാകാത്തതെന്ന് പറയുന്നു. ഇയാള്‍ ആനയെ വില്‍ക്കുവാന്‍ ശ്രമിച്ചിരുന്നതായും വാര്‍ത്തയുണ്ട്. ഉടമയും പാപ്പാനും ഉപേക്ഷിച്ചതോടെ ആന ഒറ്റപ്പെടുകയായിരുന്നു. തുടര്‍ച്ചയായി ആഹാരം ലഭിക്കാത്തതിനാല്‍ ആന തീര്‍ത്തും അവശനാണ്. വെറ്റിനറി ഡോക്ടര്‍മാര്‍ ആനയെ പരിശോധിച്ച് ചികിത്സ ആരംഭിച്ചിട്ടുണ്ട്. ആന ഉപേക്ഷിക്കപ്പെട്ട നിലയില്‍ കണ്ടതിനെ തുടര്‍ന്ന് നാട്ടുകാരാണ് ഫോറസ്റ്റ് അധികൃതരെ വിവരമറിയിച്ചത്. വിഷയം വനം – വന്യജീവി വകുപ്പ് മന്ത്രി കെ. ബി. ഗണേഷ് കുമാറിന്റെ ശ്രദ്ധയില്‍ പെടുത്തിയിട്ടുണ്ട്. ഉടമയ്ക്കെതിരെ നാട്ടാന പരിപാലന ചട്ടം ലംഘിച്ചതിന്റെ പേരില്‍ കേസെടുത്തിട്ടുണ്ട്.