സ്വാശ്രയ മെഡിക്കൽ പ്രവേശന വിഷയത്തിൽ മുഖ്യമന്ത്രിയും പ്രതിപക്ഷവും തമ്മിൽ നിയമസഭയിൽ വൻ വാക്കേറ്റം അരങ്ങേറി. സമരത്തെ മുഖ്യമന്ത്രി പരിഹസിച്ചതിനെ തുടർന്നാണ് രംഗം വഷളായത്. തന്നെ കരിങ്കൊടി കാട്ടിയത് യൂത്ത് കോൺഗ്രസ്സ്കാരല്ല ചാനലുകാർ വാടകക്കെടുത്തവരാണെന്നായിരുന്നു മുഖ്യമന്ത്രിയുടെ വിമർശനം.
പോലീസിനു നേരെ ആക്രമണമുണ്ടായതിനാലാണ് ലാത്തിച്ചാർജ് നടത്തിയത്. ചുവന്ന മഷി ഷർട്ടിൽ പുരട്ടി പോലീസ് ആക്രമിച്ചു എന്നു വരുത്തി തീർക്കാനാണ് യൂത്ത് കോൺഗ്രസ്സ് ശ്രമിച്ചത്. സർക്കാർ ചർച്ച തുടങ്ങിയ സാഹചര്യത്തിൽ സമരം നിർത്തണമെന്നും മുഖ്യമന്ത്രി ആവശ്യപ്പെട്ടു. ബഹളം വെച്ചതുകൊണ്ട് താൻ പറയാനുള്ളത് പറയാതിരിക്കില്ലെന്നും സ്വാശ്രയ കരാറിൽ നിന്നും പിന്നോട്ട് പോകില്ലെന്നും അദ്ദേഹം കൂട്ടിച്ചേർത്തു.
