ഒരു ഇടവേളയ്ക്ക് ശേഷം ഗ്ലാമര്‍ നായിക ഷക്കീല മലയാളത്തില്‍ തിരിച്ചെത്തുന്നു. ബൈജു എഴുപുന്ന സംവിധാനം ചെയ്യുന്ന പുതിയ ചിത്രത്തില്‍ മിസ് വേള്‍ഡ് റണ്ണറപ്പ് പാര്‍വ്വതി ഓമനക്കുട്ടനൊപ്പമാണ് ഷക്കീല അഭിനയിക്കുന്നത്. ഗ്ലാമര്‍ നായികയും സുന്ദരിയും ഒത്തു ചേരുന്ന ചിത്രത്തിന്റെ അണിയറ പ്രവര്‍ത്തനങ്ങള്‍ നടന്നു വരികയാണ്. 2000-ല്‍ ഇറങ്ങിയ കിന്നാരത്തുമ്പികള്‍ എന്ന ചിത്രമാണ് ഷക്കീലയെ മലയാളി മനസ്സില്‍ പ്രതിഷ്ഠിച്ചത്. തുടര്‍ന്ന് നിരവധി സോഫ്റ്റ് പോണ്‍ ചിത്രങ്ങള്‍ ഷക്കീല നായികയായി മലയാളത്തില്‍ ഇറങ്ങി. ഷക്കീലയെ കൂടാതെ രേഷ്മ, സിന്ധു, മറിയ തുടങ്ങി പല നടിമാരും ഇത്തരം ചിത്രങ്ങളില്‍ മേനി പ്രദര്‍ശനത്തിനായി പ്രത്യക്ഷപ്പെട്ടിരുന്നു. ഇവയില്‍ മിക്കവയും വന്‍ സാമ്പത്തിക നേട്ടം ഉണ്ടാക്കുകയും ചെയ്തു. രതി ചിത്രങ്ങളുടെ കാലം കഴിഞ്ഞതോടെ ഇടക്ക് ഷക്കീല സിനിമയില്‍ നിന്നും വിട്ട് നിന്നു. പിന്നീട് ഹാസ്യ നടിയായിട്ടാണ് അവര്‍ തിരിച്ചെത്തിയത്. ഇടയ്ക്ക് ഛോട്ടാ മുംബൈ എന്ന മോഹന്‍ ലാല്‍ ചിത്രത്തിലും പൃഥ്‌വി രാജ് നായകനായ തേജാഭായ് ആന്റ് ഫാമിലിയിലും ഷക്കീല അഭിനയിച്ചു എങ്കിലും തുടർന്ന് കൂടുതല്‍ ചിത്രങ്ങള്‍ ഒന്നും അവരെ തേടിയെത്തിയില്ല. ഇതിനിടയില്‍ ഷക്കീല തന്റെ ആത്മകഥ എഴുതുന്നതായും വാര്‍ത്തകള്‍ ഉണ്ടായിരുന്നു.
- എസ്. കുമാര്‍
