കൊച്ചി: മാറ്റിനി എന്ന സിനിമയുടെ പോസ്റ്ററില്‍ പുകവലിച്ചു പ്രത്യക്ഷപ്പെട്ട നടി മൈഥിലിയ്ക്കെതിരെ പുകയില നിയന്ത്രണ നിയമ പ്രകാരം ആരോഗ്യ വകുപ്പ് കേസെടുത്തു. ചിത്രത്തിന്റെ നിര്‍മ്മാതാവ് പ്രശാന്ത് നാരായണന്‍ സംവിധാകന്‍ അനീഷ് ഉപാസന എന്നിവര്‍ക്കെതിരെയും കേസെടുത്തിട്ടുണ്ട്. രണ്ടു വര്‍ഷം വരെ തടവും പിഴയും ലഭിക്കാവുന്ന വകുപ്പുകള്‍ പ്രകാരമാണ് കേസെടുത്തിട്ടുള്ളത്. മാറ്റിനി എന്ന സിനിമയ്ക്കു വേണ്ടി നായികയായ മൈഥിലി പുകവലിക്കുന്നതായി അഭിനയിച്ചിരുന്നു. ഇതാണ് പിന്നീട് പോസ്റ്ററില്‍ ഉപയോഗിച്ചത്. വഞ്ചിയൂര്‍ ഒന്നാം ക്ലാസ് മജിസ്ട്രേറ്റ് കോടതിയില്‍ കുറ്റപ്ത്രം സമര്‍പ്പിച്ചു. തിരുവനന്തപുരം നഗരത്തിലെ പ്രസിദ്ധമായ കോട്ടണ്‍ ഹില്‍ സ്കൂളിന്റെ പരിസരത്തുള്‍പ്പെടെ നിരവധി സ്ഥലങ്ങളില്‍ പോസ്റ്റര്‍ പതിച്ചിട്ടുണ്ട്. പോസ്റ്ററുകള്‍ പിന്നീട് ആരോഗ്യ വകുപ്പ് നീക്കം ചെയ്തു.
സിനിമയില്‍ കഥപാത്രത്തിന് യോജിക്കുന്ന രീതിയിലാണ് താന്‍ അഭിനയിച്ചതെന്നും പോസ്റ്ററുമായി ബന്ധപ്പെട്ട് വന്ന കെസ് നിയമ വിദഗ്ദരുമായി ആലോചിക്കുമെന്നും നടി വ്യക്തമാക്കി. പുകവലി മദ്യപാനം എന്നിവയെ താന്‍ പ്രോത്സാഹിപ്പിക്കില്ലെന്നും അവര്‍ പറഞ്ഞു. മാറ്റിനിയില്‍ മൈഥിലി അവതരിപ്പിച്ച ഐറ്റം ഡാന്‍സ് ഇതിനോടകം ശ്രദ്ധിക്കപ്പെട്ടിട്ടുണ്ട്. യൂറ്റൂബ് ഫേസ് ബുക്ക് തുടങ്ങി സോഷ്യല്‍ നെറ്റ്‌വര്‍ക്കുകളില്‍ സൂപ്പര്‍ ഹിറ്റാണ് ഈ ഗാനം.
