റാസല്‍ഖൈമ: വ്യാഴാഴ്ച പുലര്‍ച്ചെ പുലര്‍ച്ചെ 5.30ഓടെ റാസല്‍ഖൈമ യിലുണ്ടായ വാഹനാപകടത്തില്‍ ഒരു മലയാളിയും മൂന്ന് ബംഗ്ളാദേശ് സ്വദേശികളും മരിച്ചു. മലപ്പുറം പെരുമ്പടപ്പ് പുത്തന്‍പള്ളിക്ക് സമീപം വൈശ്യംവീട്ടില്‍ മുഹമ്മദിന്‍െറ മകന്‍ മരക്കരക്കയില്‍ നിസാര്‍ (26) ആണ് മരിച്ച മലയാളി. അപ്പു മൊല്ല സിദ്ദീഖ് മൊല്ല (26), ജമാലുദ്ദീന്‍ അബ്ദുല്‍ ഹാദി (31), മുഹമ്മദ് ദാവൂദ് അസമാന്‍ മുഹമ്മദ് (27) എന്നിവരാണ് മരിച്ച ബംഗ്ളാദേശ് സ്വദേശികള്‍. കോര്‍ക്വെയര്‍ മേഖലയിലേക്ക് അല്‍ നഖീലില്‍ നിന്ന് ജീവനക്കാരുമായി പുറപ്പെട്ട അമ്മാര്‍ ക്ളീനിങ് ആന്‍റ് കോണ്‍ട്രാക്ടിങ് കമ്പനിയുടെ 28 സീറ്റര്‍ വാന്‍ റംസില്‍ ഭാഗത്ത് അപകടത്തില്‍പ്പെട്ടത്. അപകടകാരണം വ്യക്തമല്ല. രണ്ടര വര്‍ഷമായി അമ്മാര്‍ കമ്പനിയില്‍ ജോലി ചെയ്ത് വരികയായിരുന്ന നിസാര്‍ അവിവാഹിതനാണ്. നിസാറിന്‍െറ മൃതദേഹം പോസ്റ്റുമോര്‍ട്ടത്തിന് ശേഷം നടപടികള്‍ പൂര്‍ത്തിയാക്കി ഇന്നലെ രാത്രി ഷാര്‍ജയില്‍ നിന്ന് കോഴിക്കോടിനുള്ള ഇന്ത്യന്‍ എയര്‍ലൈന്‍സ് വിമാനത്തില്‍ നാട്ടിലേക്ക് കൊണ്ടുപോയി. കോഴിക്കോട് സ്വദേശി ലത്തീഫ്, തമിഴ്നാട് സ്വദേശികളായ ഇസ്മായില്‍, മുഹമ്മദ് നസീര്‍ തുടങ്ങിയ 15ഓളം പേര്‍ പരിക്കുകളോടെ റാസല്‍ഖൈമ സഖര്‍ ഹോസ്പിറ്റലില്‍ ചികില്‍സയിലാണ്.
- ന്യൂസ് ഡെസ്ക്
