അബുദാബി : അന്തരിച്ച കേരള മുൻ മുഖ്യമന്ത്രി ഉമ്മൻ ചാണ്ടിക്ക് അബുദാബി മലയാളികള്‍ ആദരവ് അർപ്പിച്ചു. ഇന്ത്യൻ ഇസ്ലാമിക് സെന്‍ററില്‍ സംഘടിപ്പിച്ച അനുസ്മരണ സമ്മേളനത്തില്‍ അബുദാബി മലയാളി സമാജം, ഇന്ത്യന്‍ ഇസ്ലാമിക് സെന്റര്, ഐ. എസ്. സി., കെ. എസ്. സി., കെ. എം. സി. സി., ഇന്‍കാസ് എന്നീ സംഘടനകളുടെ സാരഥികളും ഭാരവാഹികളും സംഘടനാ പ്രവർത്തകരും സംബന്ധിച്ചു.
സമാജം പ്രസിഡണ്ട് റഫീഖ് കയനയില്‍ അദ്ധ്യക്ഷത വഹിച്ചു. ഇന്‍കാസ് പ്രസിഡണ്ട് ബി. യേശുശീലന്‍ അനുശോചന പ്രമേയം അവതരിപ്പിച്ചു. വിവിധ സംഘടനകളെയും സാംസ്കാരിക കൂട്ടായ്മകളേയും പ്രതിനിധീകരിച്ച് ഭാരവാഹികളും സാംസ്കാരിക പ്രവർത്തകരും അനുസ്മരണ യോഗത്തില്‍ സംസാരിച്ചു.
