അബുദാബി : പലവിധ കാരണങ്ങളാൽ ചലന ശേഷി നഷ്ടപ്പെട്ടവർക്ക് കൈത്താങ്ങായി 4 മില്യൺ ദിർഹം (9.2 കോടി രൂപ) ചികിത്സാ സഹായം പ്രഖ്യാപിച്ച് ബുർജീൽ ഹോൾഡിംഗ്‌സ് സ്ഥാപകൻ ഡോ. ഷംഷീർ വയലിൽ. ബുർജീൽ മെഡിക്കൽ സിറ്റിയിൽ (ബി. എം. സി.) പുതിയതായി ആരംഭിച്ച അൽ മുദിരിസ് ഓസിയോ ഇന്റഗ്രേഷൻ ക്ലിനിക്കിന്റെ ഉദ്‌ഘാടന വേളയിലാണ് പ്രഖ്യാപനം.

സാമ്പത്തികമായി പിന്നാക്കം നിൽക്കുന്ന 10 പേർക്ക് ഈ പദ്ധതിയിലൂടെ അതി നൂതന ഓസിയോ ഇന്റ ഗ്രേറ്റഡ് പ്രോസ്തെറ്റിക് ലിംബ് (Osseo integrated Prosthetic Limb) ചികിത്സാ സഹായം സൗജന്യമായി നൽകും.

ഓസിയോ ഇന്റഗ്രേഷന് ശസ്ത്ര ക്രിയകളിൽ വിദഗ്ദ്ധനായ ലോക പ്രശസ്ത ഓർത്തോ പീഡിക് സർജൻ പ്രൊഫ. ഡോ. മുൻജിദ് അൽ മുദിരിസ് സർജറികൾ നടത്തും.

രാജ്യം ‘ഇയർ ഓഫ് കമ്മ്യൂണിറ്റി’ ആചരിക്കുമ്പോൾ, സഹായം ആവശ്യം ഉള്ളവർക്ക് എത്തിച്ച് അവരെ സാധാരണ ജീവിത ത്തിലേക്ക് കൈ പിടിച്ചു ഉയർത്തുകയും ചെയ്യുക എന്നത് നമ്മുടെ ഉത്തര വാദിത്വം കൂടിയാണ്.

പുതിയ ക്ലിനിക്കിലൂടെ ഇത്തരം നിരവധി സർജറികൾ നടത്താനാണ് ലക്ഷ്യമിടുന്നത് എന്നും മാനുഷികമായ സഹായത്തിലൂടെയുള്ള തുടക്കം ഏറെ അർത്ഥ വത്താകും എന്നാണു പ്രതീക്ഷ എന്നും ഡോ. ഷംഷീർ പറഞ്ഞു.

വിനാശകരമായ ഭൂകമ്പത്തെ തുടർന്ന് ചികിത്സക്കായി സിറിയയിൽ നിന്ന് ബി. എം. സി. യിൽ എത്തിച്ച ഷാമിന്റെയും അവളുടെ മൂത്ത സഹോദരൻ ഒമറിന്റെയും കഥയാണ് പുതിയ സെന്റര് തുടങ്ങാൻ ഡോ. ഷംഷീറിന്‌ പ്രചോദനം നൽകിയത്.

ഭൂകമ്പ അവശിഷ്ടങ്ങൾക്ക് അടിയിൽ പെട്ട് കൈ കാലുകൾ നഷ്ടപ്പെടുകയും മനസിനും ശരീരത്തിനും ഏറെ കേടുപാടുകൾ പറ്റിയ സഹോദരങ്ങളെ യു. എ. ഇ. രാഷ്ട്ര മാതാവും എമിറേറ്റ്സ് റെഡ് ക്രസൻറ് ഓണററി പ്രസിഡണ്ടുമായ ശൈഖ ഫാത്തിമ ബിൻത് മുബാറക്കിന്റെ നിർദ്ദേശ പ്രകാരം ആയിരുന്നു രാജ്യത്തേക്ക് കൊണ്ട് വന്നത്.

ബി. എം. സി. യിലെ അതി സങ്കീർണ്ണ ശസ്ത്രക്രിയ – പുനരധിവാസ ത്തിന്റെയും ഫലമായി സഹോദര ങ്ങൾ പതിയെ ജീവിത ത്തിലേക്ക് നടന്ന് കയറി. ഷാമിനെയും ഒമറിനെയും പോലെ ദുരന്ത ഭൂമികളിലും സംഘർഷ മേഖലകളിലും പെട്ട് ചലന ശേഷി നഷ്ട പ്പെട്ടവർക്ക് വീണ്ടും നടക്കാൻ കഴിയണം എന്നുള്ള അദ്ദേഹത്തിന്റെ ദൃഢ നിശ്ചയം പ്രൊഫ. ഡോ. അൽ മുദിരിസുമായുള്ള പങ്കാളിത്തത്തിന് തുടക്കമിട്ടു.