അബുദാബി : യു. എ. ഇ. കരാട്ടെ ഫെഡറേഷന്‍റെ സഹകരണത്തോടെ അബുദാബിയിലെ വിന്നർ കരാട്ടെ ക്ലബ്ബ് സംഘടിപ്പിക്കുന്ന ഇന്‍റർ നാഷണൽ കരാട്ടെ ചാമ്പ്യൻഷിപ്പ് നവംബർ 17 ഞായറാഴ്ച അബുദാബി അല്‍ ജസീറ ക്ലബ്ബില്‍ നടക്കും. ഇന്ത്യ, ഇറാൻ, ഒമാൻ, ഉസ്ബെക്കിസ്ഥാൻ, കിർഗിസ്ഥാൻ തുടങ്ങിയ രാജ്യ ങ്ങളിൽ നിന്നും യു. എ. ഇ. യിലെ വിവിധ എമിറേറ്റുകളിലെ കരാട്ടെ ക്ലബ്ബുകളിൽ നിന്നുമായി അറുനൂറോളം പേർ പങ്കെടുക്കും.
കത്ത, കുമിത്തേ എന്നീ ഇനങ്ങളിൽ പ്രായവും ഭാരവും അനുസരിച്ച് വ്യത്യസ്ത വിഭാഗങ്ങളിലാണ് മത്സരം. ഇത്തവണ ഓപ്പൺ കുമിത്തേ വിഭാഗത്തിൽ ക്യാഷ് പ്രൈസ് മത്സരവും ഉൾപ്പെടുത്തിയിട്ടുണ്ട്. യു. എ. ഇ. കരാട്ടെ ഫെഡറേഷന്‍റെ അംഗീകാരമുള്ള ഔദ്യോഗിക റഫറിമാർ മത്സരം നിയന്ത്രിക്കും. കാണികൾക്ക് പ്രവേശനം സൗജന്യം.
മത്സരം തത്സമയം യുട്യൂബിലും മറ്റു സമൂഹ മാധ്യമ പേജുകളിലും സംപ്രേഷണം ചെയ്യും.
പങ്കെടുക്കാൻ താൽപര്യമുള്ളവർ 050 244 2313 എന്ന ഫോൺ നമ്പറിലോ winnercupabudhabi @ gmail.com എന്ന ഇ – മെയിൽ വിലാസ ത്തിലോ ബന്ധപ്പെടണം. 5 വയസ്സു മുതല്‍ 56 വരെ പ്രായമുള്ളവര്‍ നിലവില്‍ രജിസ്റ്റര്‍ ചെയ്തതായി സംഘാടകർ വാർത്താ സമ്മേളനത്തിൽ അറിയിച്ചു. ഈ മാസം 10 വരെ രജിസ്ട്രേഷൻ സ്വീകരിക്കും.
വാര്‍ത്താ സമ്മേളനത്തില്‍ വിന്നർ കരാട്ടെ ക്ലബ് എം. ഡി. യും സംഘാടക സമിതി ചെയർമാനുമായ ഷിഹാൻ എം. എ. ഹക്കീം, കൺവീനർ ഷിഹാൻ അരുണ്‍ കൃഷ്ണന്‍, റജിസ്ട്രേഷൻ കോഡിനേറ്റർ സെൻ സായ് നെമീർ, സംഘാടക സമിതി ഭാരവാഹികളായ ഷിഹാൻ ഷൌക്കത്ത് വള്ളിയത്ത്, സെൻ സായ് ഗോപകുമാർ, സെൻസായ് അരുൺ, സെൻസായ് യധുകൃഷ്ണൻ എന്നിവർ പങ്കെടുത്തു. Instagram
