ബഹ്റിനില്‍ നടന് പതിമൂന്നാമത് ജി.സി.സി റേഡിയോ ടിവി ഫെസ്റ്റിവലില്‍ 13 പുരസ്ക്കാരങ്ങള്‍ നേടി ഖത്തര്‍ ഒന്നാം സ്ഥാനം നേടി. അഞ്ച് സ്വര്‍ണവും എട്ട് വെള്ളിയും നേടിയാണ് ഖത്തര്‍ ഒന്നാമത് എത്തിയത്. യു.എ.ഇ രണ്ടാം സ്ഥാനവും ഒമാന്‍ മൂന്നാം സ്ഥാനവും നേടി. ബഹ്റിന്‍ സാംസ്കാരിക വകുപ്പ് മന്ത്രി ശൈഖ മായ് ബിന്‍ത് മുഹമ്മദ് അല്‍ ഖലീഫ ഫെസ്റ്റിവല്‍ ഉദ്ഘാടനം ചെയ്തു.

ബഹ്റിനിലെ കാസര്‍ക്കോട് ജില്ലാ പ്രവാസി അസോസിയേഷന്‍റെ വാര്‍ഷിക ആഘോഷങ്ങളുടെ ഭാഗമായി വ്യക്തിത്വ വികസന ക്ലാസ് സംഘടിപ്പിച്ചു. ഈ മാസം 26 ന് വെള്ളിയാഴ്ച കന്നട സംഘം ഓഡിറ്റോറിയത്തിലാണ് പരിപാടി. ജെ.സി.ഐ ഇന്‍റര്‍നാഷണല്‍ ട്രെയിനര്‍ എം.എന്‍ സുനില്‍ കുമാര്‍ ക്ലാസെടുക്കും.

കൊട്ടാരക്കര സെന്‍റ് ഗ്രിഗോറിയോസ് കോളേജ് അലുംമ്നി അസോസിയേഷന്‍ ബഹ്റിന്‍ ചാപ്റ്ററിന്‍റെ ഉദ്ഘാടനം ഈ മാസം 18 ന് നടക്കും.

സൗത്ത് പാര്‍ക്കില്‍ നടക്കുന്ന പരിപാടിയില്‍ അനില്‍ വര്‍ഗീസ്, ജോണ്‍ ഐപ്പ് എന്നിവര്‍ പങ്കെടുക്കും.

അമേരിക്കയും ഇസ്ലാമിക ലോകവും തമ്മില്‍ ഭിന്നതകളുണ്ടെങ്കില്‍ അവ പരിഹരിക്കുന്നതിന് തുറന്ന സംവാദങ്ങളും യോജിച്ച ധാരണയുമാണ് വേണ്ടതെന്ന് ഖത്തര്‍ പ്രധാനമന്ത്രിയും വിദേശകാര്യ മന്ത്രിയുമാമയ ശൈഖ് ഹമദ് ബിന്‍ ജാസിം ബിന്‍ ജാബിര്‍ അല്‍ഥാനി പറ‍ഞ്ഞു.

മൂന്ന് ദിവസം നീണ്ടു നില്‍ക്കുന്ന യു.എസ്-ഇസ്ലാമിക് വേള്‍ഡ് ഫോറം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

മുമ്പ് നടന്ന സമ്മേളനങ്ങള്‍ അമേരിക്കയും ഇസ്ലാമിക ലോകവും തമ്മിലുള്ള ബന്ധങ്ങള്‍ ക്രിയാത്മകമായി ചര്‍ച്ച ചെയ്തുവെങ്കിലും ശരിയായ നയങ്ങളുടെ അഭാവം മൂലം സംഘര്‍ഷങ്ങള്‍ക്ക് വഴിവയ്ക്കുകയും അതുവഴി ബന്ധങ്ങള്‍ ദുര്‍ബലപ്പെടുകയുമായിരുന്നുവെന്ന് ഖത്തര്‍ പ്രധാനമന്ത്രി പറഞ്ഞു.

മലയാളികള്‍ കഠിനാധ്വാനം ചെയ്യുന്നവരായത് കൊണ്ടാണ് അറബ് സമൂഹത്തിന് അവര്‍ പ്രിയങ്കരരായി മാറിയതെന്ന് യു.എ.ഇ റെഡ് ക്രസന്‍റ് മാനേജര്‍ മുഹമ്മദ് അബ്ദല്‍ കരീം അല്‍ ഹാജ് അല്‍ സറൗനി പറഞ്ഞു. രിസാല സ്റ്റഡി സര്‍ക്കിള്‍ ദുബായ് സോണല്‍ കമ്മിറ്റി സംഘടിപ്പിച്ച കള്‍ച്ചറല്‍ കമ്യൂണ്‍ സമാപന സംഗമം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

എസ്.എസ്.എഫ് സംസ്ഥാന പ്രസിഡന്‍റ് എന്‍.എം സാദിഖ് സഖാഫി പെരിന്താറ്റിരി , കൂറ്റമ്പാറ അബ്ദുറഹ്മാന്‍ ദാരിമി, തോമസ് തുടങ്ങിയവര്‍ പ്രസംഗിച്ചു. മുസ്തഫ ദാരിമി വിളയൂര്‍ അധ്യക്ഷത വഹിച്ചു.