ലണ്ടന്‍:വാര്‍ത്തകള്‍ക്കായി പ്രമുഖരുടെ ഫോണ്‍ ചോര്‍ത്തല്‍ വിഷയവുമായി ബന്ധപ്പെട്ട് ബ്രിട്ടണിലെ ‘സണ്‍‌ഡേ മിറര്‍’ ദിനപത്രത്തിനു നേരെയും ആരോപണം ഉയരുന്നു. ഹോളിവുഡ് താരം ലിസ് ഹര്‍ളി, ഫുട്ബോള്‍ താരം റിയോ ഫെര്‍ഡിനാന്റ് എന്നിവരുടെ ഫോണ്‍ ചോര്‍ത്തലിന് താന്‍ ദൃക്‌‌സാക്ഷിയാണെന്ന് സണ്‍‌ഡേ മിററിന്റെ മുന്‍ ലേഖകന്‍ ബി.ബി.സി ചാനലിനോട് വെളിപ്പെടുത്തി. ഇതോടെ ഫോണ്‍ ചോര്‍ത്തല്‍ വിവാദം ബ്രിട്ടണില്‍ ഒന്നു കൂടെ ചൂടു പിടിച്ചു.
അടുത്തിടെ ‘ന്യൂസ് ഓഫ് ദ വേള്‍ഡ്‘’ എന്ന ടാബ്ലോയ്‌ഡ് ഫോണ്‍ ചോര്‍ത്തല്‍ വിവാദത്തില്‍ പെട്ടതിനെ തുടര്‍ന്ന് അടച്ചു പൂട്ടിയിരുന്നു. ഇതുമായി ബന്ധപ്പെട്ട് ആഗോള മാധ്യമ ഭീമന്‍ റൂപ്പര്‍ട്ട് മര്‍ഡോക് കഴിഞ്ഞ ആഴ്ചയില്‍ ബ്രിട്ടീഷ് ജനപ്രതിനിധി സഭാംഗങ്ങള്‍ ഉള്‍പ്പെടുന്ന കമ്മറ്റിക്ക് മുമ്പില്‍ ഹാജരായി മൊഴി നല്‍‌കേണ്ടിയും വന്നു. ഫോ‌ണ്‍ ചോര്‍ത്തല്‍ സംഭവത്തില്‍ റൂപ്പര്‍ട്ട് മര്‍ഡോക്കും മകനും ഫോണ്‍ ചോര്‍ത്തലിന് മാപ്പു പറഞ്ഞിരുന്നു.

ലണ്ടന്‍: പ്രശസ്‌ത ബ്രിട്ടിഷ്‌ ചിത്രകാരന്‍ ലൂസിയന്‍ ഫ്രോയ്‌ഡ് (88) അന്തരിച്ചു. 1922 ല്‍ ബെര്‍ലിനിലാണ് ലൂസിയന്‍ ജനിച്ചത്‌. പത്താം വയസില്‍ കുടുംബത്തോടൊപ്പം ബ്രിട്ടനിലെത്തിയ ഇദ്ദേഹം 1939ല്‍ ബ്രിട്ടിഷ്‌ പൗരത്വം സ്വീകരിച്ചു. റിയലിസം ശൈലിയിലുള്ള ഇദ്ദേഹത്തിന്റെ ചിത്രങ്ങള്‍ ഏറെ ശ്രദ്ധിക്കപെട്ടിരുന്നു. പ്രഗത്ഭനായിരുന്ന ഈ ചിത്രകാരന്‍ ബ്രിട്ടീഷ്‌ രാജ്‌ഞിയുടെ ‘ഓര്‍ഡര്‍ ഓഫ്‌ മെറിറ്റ്‌’ ബഹുമതി നേടിയിരുന്നു. ലോകപ്രശസ്‌ത മനശാസ്‌ത്രജ്‌ഞന്‍ സിഗ്മണ്ട്‌ ഫ്രോയിഡിന്റെ കൊച്ചുമകനാണ് ലൂസിഫര്‍ ഫ്രോയിഡ്.
സമീപകാലത്ത്‌ ഏറ്റവുമധികം ആരാധകരുള്ള ചിത്രകാരനായിരുന്നു ലൂസിയന്‍. ജീവിച്ചിരിക്കെ തന്നെ ഏറ്റവും അധികം വിലക്ക് ചത്രം വിറ്റുപോയ റെക്കോര്‍ഡ്‌ ഇദ്ദേഹത്തിന്റെ പേരിലുള്ളതാണ്. തടിച്ച ഒരു സ്‌ത്രീ നഗ്നയായി സോഫയില്‍ കിടക്കുന്ന ചിത്രം മൂന്നു വര്‍ഷം മുമ്പ്‌ 33.6 ദശലക്ഷം ഡോളറിനാണു വിറ്റുപോയത്‌.

ലണ്ടന്‍: ഫോണ്‍ ചോര്‍ത്തലുമായി ബന്ധപ്പെട്ട്‌ ന്യൂസ്‌ ഇന്റര്‍നാഷണലിന്റെ മുന്‍ സി.ഇ.ഒയും ന്യൂസ്‌ ഓഫ്‌ ദ വേള്‍ഡ്‌ എഡിറ്ററുമായിരുന്ന റെബേക്ക ബ്രൂക്ക്‌സിനെ അറസ്‌റ്റ് ചെയ്‌തു. ഫോണ്‍ ചോര്‍ത്തലിനു ഗൂഢാലോചന നടത്തിയെന്ന സംശയത്തിന്മേലാണ്‌ അറസ്‌റ്റ്. ഫോണ്‍ ചോര്‍ത്തലിന്റെ പേരില്‍ ‘ന്യൂസ്‌ ഓഫ്‌ ദ വേള്‍ഡ്‌’ ടാബ്ലോയ്‌ഡ് അടച്ചുപൂട്ടിയ മാധ്യമ രാജാവ് മര്‍ഡോക്കിന്റെ കുടുംബം അധാര്‍മിക മാര്‍ഗങ്ങളിലൂടെയുള്ള വാര്‍ത്താശേഖരണത്തിന്റെ പേരില്‍ രാജ്യത്തോടു മാപ്പു പറഞ്ഞിരിരുന്നു. ബ്രിട്ടീഷ്‌ പാര്‍ലിമെന്റില്‍ ലേബര്‍ പാര്‍ട്ടി നേതാവ്‌ ഈദ്‌ മിലിബന്ദ് പുതിയ മാധ്യമ നിയമം ആവശ്യപ്പെട്ട് രംഗത്ത് വന്നതും, ഉപപ്രധാനമന്ത്രി നിക്‌ ക്ലെഗ്‌ മിലിബന്ദിന്റെ ആവശ്യത്തിനു പിന്തുണ പ്രഖ്യാപിച്ചതും, മാധ്യമരംഗത്തെ അധികാരകേന്ദ്രീകരണം തടയാന്‍ പുതിയ മാധ്യമ ഉടമസ്‌ഥാവകാശ നിയമം ആവശ്യപ്പെട്ട്‌ ലേബര്‍ പാര്‍ട്ടി പരസ്യമായി രംഗത്ത് വന്നതും ബ്രിട്ടനില്‍ റൂപര്‍ട്ട്‌ മര്‍ഡോക്‌ കെട്ടിപ്പൊക്കിയ സാമ്രാജ്യം ഭീഷണിയാകും. ഇതോടെ ബ്രിട്ടനില്‍ മാധ്യമ രംഗത്ത് മര്‍ഡോക്കിനുള്ള സ്വാധീനം നഷടപ്പെടുകയാണ്. മര്‍ഡോക്ക്‌ തോല്‍വി അറിഞ്ഞു തുടങ്ങി എന്നാണ് ബ്രിട്ടനില്‍ ജനങ്ങള്‍ക്കിടയിലെ സംസാരം.