ഗദ്ദാമയ്ക്ക് ശേഷം കാവ്യ തികച്ചും വ്യത്യസ്തമായ ഒരു വേഷത്തില്‍ വീണ്ടും നായികയായി വരുന്നു. നവാഗത സംവിധായകന്നായ സുധീര്‍ അമ്പലപ്പാടിന്റെ ‘ബ്രേക്കിങ് ന്യൂസ് ലൈവ്’ എന്ന ചിത്രത്തിലാണ് കാവ്യ നായികയാകുന്നത്. ഗദ്ദാമയ്ക്ക് ശേഷം കാവ്യ ചെയ്യുന്ന ശക്തമായ കഥാപാത്രം കൂടിയാകും ബ്രേക്കിങ് ന്യൂസിലേത്. ഷാ പ്രൊഡക്ഷന്‍സിന്റെ ബാനറില്‍ ഷറഫുദ്ദീന്‍ ഷായാണ് ചിത്രം നിര്‍മ്മിക്കുന്നത്. കഥയും സുധീര്‍ അമ്പലപ്പാടിന്റേതു തന്നെ. ചിത്രത്തിന്റെ തിരക്കഥ യൊരുക്കുന്നത് സുധീറും ജി. കിഷോറും ചേര്‍ന്നാണ്.
”പത്ര പ്രര്‍ത്തന രംഗത്തു നിന്നാണ് ഞാന്‍ സിനിമാ രംഗത്തേക്ക് വരുന്നത്. ചില സാമൂഹിക പ്രശ്‌നങ്ങള്‍ മനസ്സിനെ വല്ലാതെ ഉലച്ചപ്പോള്‍ എനിക്കു പറയാനുള്ള കാര്യങ്ങള്‍ സിനിമയാക്കണമെന്ന് തീരുമാനമെടുക്കുകയായിരുന്നു. സമകാലീന വിഷയങ്ങള്‍ സിനിമയില്‍ കടന്നു വരുന്നുണ്ട്. എന്നാല്‍ വാര്‍ത്തകളെ കച്ചവടവത്കരിക്കുന്ന സിനിമയാകില്ല ബ്രേക്കിങ് ന്യൂസ് ലൈവ്”- തന്റെ പ്രഥമ സംരംഭത്തെ കുറിച്ച് സുധീറിന്റെ നിലപാട്. എറണാകുളത്തും കോഴിക്കോട്ടും ഒറ്റപ്പാലത്തും ഹൈദരാബാദിലുമായി സപ്തംബറില്‍ ചിത്രത്തിന്റെ ഷൂട്ടിങ് തുടങ്ങും . കാവ്യയോടൊപ്പം മലയാളത്തിലെ പ്രമുഖ താരങ്ങളും ബ്രേക്കിങ് ന്യൂസില്‍ അഭിനയിക്കുന്നുണ്ട്. നിര്‍മാതാവ് ഷറഫുദ്ദീന്‍ ഷായും സിനിമയില്‍ പ്രധാനപ്പെട്ട ഒരു വേഷം ചെയ്യുന്നു.
