അബുദാബി : മാർത്തോമ്മാ ഇടവകയുടെ ഈ വർഷത്തെ കൊയ്ത്തുത്സവം നവംബർ 30 ഞായറാഴ്ച മുസ്സഫയിലെ മാർത്തോമ്മാ ദേവാലയ അങ്കണത്തിൽ നടക്കും.
രാവിലെ 9:30 നു തുടക്കമാവുന്ന ആരാധനയ്ക്കും ആദ്യ ഫല സമർപ്പണത്തിനും ശേഷമാണ് വിളവെടുപ്പുത്സവ ത്തിന് തുടക്കം കുറിക്കുക. വൈകുന്നേരം മൂന്നു മണിക്ക് വർണ്ണാഭമായ വിളംബര ഘോഷ യാത്രയോടെ കൊയ്ത്തുത്സവത്തിന്റെ പ്രധാന പരിപാടികൾ ആരംഭിക്കും.
വിളവിന്റെയും ദൈവാനുഗ്രഹത്തിന്റെയും സമൃദ്ധി പ്രതിഫലി പ്പിക്കുന്ന മനോഹര ദൃശ്യാവിഷ്കാരങ്ങൾ ഘോഷ യാത്രയെ അലങ്കരിക്കും.
തുടർന്ന് നടക്കുന്ന പൊതു സമ്മേളനത്തിൽ ഇടവക വികാരി റവ. ജിജോ സി. ഡാനിയേൽ അദ്ധ്യക്ഷത വഹിക്കും. സഹ വികാരി റവ. ബിജോ എബ്രഹാം തോമസ്, ജനറൽ കൺവീനർ ഇ. ജെ. ഗീവർഗീസ്, ജോയിന്റ് ജനറൽ കൺവീനർ ബെൻ എബി തോമസ്, സെക്രട്ടറി മാത്യു ജോർജ്, ട്രസ്റ്റിമാരായ വർഗീസ് മാത്യു (ഷിബു), എബി ജോൺ, അത്മായ ശുശ്രൂഷകൻ ബിജു വർഗീസ് എന്നിവർ പ്രസംഗിക്കും.
ഗായിക അഞ്ചു ജോസഫ് നയിക്കുന്ന സംഗീത നിശ , S-ബാൻഡ് വാദ്യ സംഗീതം, ആർട്സ് ഓഫ് അബുദാബി ഓർക്കസ്ട്ര യുടെ മിഴിവ്-2025, മാർഗം കളി, ഫോക്ക് ഡാൻസ് തുടങ്ങിയ കലാരൂപങ്ങൾ ഉത്സവ വേദിയെ വർണ്ണാഭമാക്കും.
യുവ ജന സഖ്യം തട്ടുകട, ഭക്ഷണം ചൂടോടെ വിളമ്പുന്ന ലൈവ് കുക്കിംഗ് സ്റ്റാളുകൾ, അലങ്കാരച്ചെടികൾ, ഉപകാര പ്രദമായ നിത്യോപയോഗ സാധനങ്ങൾ, വിനോദ മത്സരങ്ങൾക്കായുള്ള സ്റ്റാളുകൾ എന്നിവ യെല്ലാം കൊയ്ത്തുത്സവത്തെ കൂടുതൽ ജനകീയമാക്കും എന്നും സംഘാടകർ അറിയിച്ചു.
റവ. ജിജോ സി. ഡാനിയേൽ (വികാരി), റവ. ബിജോ എബ്രഹാം തോമസ് (സഹ വികാരി), ഇ. ജെ. ഗീവർഗീസ് (ജനറൽ കൺവീനർ), ബെൻ എബി തോമസ് (ജോ. ജനറൽ കൺവീനർ), മാത്യു ജോർജ് (സെക്രട്ടറി), വർഗീസ് മാത്യു (ഫിനാൻസ് കൺവീനർ), അബി ജോൺ (ജോയിന്റ് ഫിനാൻസ് കൺവീനർ), ബിജു വർഗീസ് (അത്മായ ശുശ്രൂഷകൻ), അഡ്വ. സിൽസി റേച്ചൽ സാമുവൽ (പബ്ലിസിറ്റി കൺവീനർ) എന്നിവർ വാർത്താ സമ്മേളനത്തിൽ പങ്കെടുത്തു.
- pma
അനുബന്ധ വാര്‍ത്തകള്‍
വായിക്കുക: harvest-fest, mar-thoma-yuvajana-sakhyam-, ആഘോഷം, പ്രവാസി, മതം, സംഗീതം
