വാളയാര്‍: വാളയാര്‍ വന മേഖലയില്‍ ചുള്ളിമടയ്ക്ക സമീപം ട്രെയിന്‍ തട്ടി കാട്ടാ‍ന ചരിഞ്ഞു. മംഗലാപുരം – ചെന്നൈ മെയില്‍ ആണ് രാത്രി പത്തു മണിയോടെ ട്രാക്കിലൂടെ കടന്നു പോകുകയായിരുന്ന ആനയെ ഇടിച്ചത്. അപടത്തില്‍ പെട്ട ആനയ്ക്കൊപ്പം ഉണ്ടായിരുന്ന കാട്ടാനക്കൂട്ടം സംഭവ സ്ഥലത്തിനരികില്‍  ഏറെ നേരം നിലയുറപ്പിച്ചിരുന്നു. അപകട വിവരം അറിഞ്ഞ് റെയില്‍വേ അധികൃതര്‍ സ്ഥലത്തെ ത്തിയിട്ടുണ്ട്.  വാളയാര്‍ വന മേഖലയില്‍ ഇടയ്ക്കിടെ ഇത്തരം അപകടങ്ങള്‍ ഉണ്ടാകുന്നുണ്ട്. വനത്തിനുള്ളിലൂടെ കടന്നു പോകുന്ന റെയില്‍വേ ട്രാക്കില്‍ പലപ്പോഴും രാത്രി കാലങ്ങളില്‍ ആണ് അപകടം ഉണ്ടാകുന്നത്. ഇതേ തുടര്‍ന്ന് കാട്ടാനകള്‍ ട്രാക്കില്‍ ഇറങ്ങുവാ തിരിക്കുവാന്‍ വേണ്ട മുന്‍ കരുതലുകള്‍ റെയില്‍വേയുടെ ഭാഗത്തു നിന്നും ഉണ്ടാകണമെന്ന ആവശ്യം ഉയര്‍ന്നിരുന്നു.

കുളത്തുങ്കല്‍ : ഒരു കൌതുകത്തിനു ആനപ്പുറത്ത് കയറിയ ആളെ ആന കുടഞ്ഞിട്ട് കുത്തിക്കൊന്നു. മണിമല വേലം മുറിയില്‍ രഘുവരന്‍ നായരാണ് (51) ആനയുടെ കൂത്തേറ്റ് മരിച്ചത്. ഇന്നലെ വൈകീട്ടായിരുന്നു സംഭവം. കുളത്തുങ്കലില്‍ സ്വകാര്യ വ്യക്തിയുടെ പറമ്പില്‍ തടി പിടിക്കുവാന്‍ കൊണ്ടു വന്ന ആനയെ തടി പിടുത്തത്തിനു ശേഷം തളയ്ക്കുവാന്‍ കൊണ്ടു പോകും വഴിയാണ് രഘുവരന്‍ നായര്‍ ആനപ്പുറത്ത് കയറിയത്. അലപ ദൂരം സവാരി ചെയ്തു ആനയെ തളയ്ക്കുവാന്‍ ഉള്ള സ്ഥലത്തെത്തി. ഇതിനിടയില്‍ പാപ്പന്റെ ശ്രദ്ധ തെറ്റിയതോടെ ആന രഘുവരന്‍ നായരെ കുടഞ്ഞിട്ട് കുത്തുകയായിരുന്നു. ശരീരത്തില്‍ കുത്തേറ്റ രഘുവരന്‍ നായര്‍ക്ക് ഗുരുതരമായ പരിക്കേല്ക്കുകയും മരണം സംഭവിക്കുകയും ചെയ്തു. രഘുവരന്‍ നായരെ കൊന്ന കൊമ്പന്‍ പിന്നീട് പ്രകോപനം ഒന്നും കാണിച്ചില്ല.

വയനാട് : 40 മണിക്കൂറിലേറെ മരണവുമായി മല്ലിട്ട കാട്ടാന ചരിഞ്ഞു. വ്യാഴാഴ്ച പുലര്‍ച്ചെയാണ് സുല്‍ത്താന്‍ ബത്തേരിക്കടുത്ത് ചെട്യാലത്തൂരില്‍ വയലില്‍ ചെളിയില്‍ പുതഞ്ഞ് അവശ നിലയില്‍ കാട്ടാനയെ കണ്ടെത്തിയത്. നാട്ടുകാര്‍ വിവരം അറിയിച്ചതിനെ തുടര്‍ന്ന് വനപാലകരും പോലീസും വിദഗ്ദ്ധരായ ഡോക്ടര്‍മാരും സ്ഥലത്ത് എത്തിയിരുന്നു.

മുപ്പതു വയസ്സ് പ്രായം തോന്നുന്ന ലക്ഷണത്തികവുള്ള കൊമ്പനെ കണ്ടെത്തുമ്പോള്‍ അത് എഴുന്നേല്‍ക്കുവാന്‍ പോലും കഴിയാത്ത നിലയില്‍ ആയിരുന്നു. തുടര്‍ന്ന്  കോന്നി ആന വളര്‍ത്തല്‍ കേന്ദ്രത്തിലെ മൃഗ സര്‍ജന്‍ ഡോ. വി. സുനില്‍ കുമാര്‍, വയനാട് വന്യജീവി സങ്കേതത്തിലെ വൈല്‍ഡ് ലൈഫ് വാര്‍ഡന്‍ വി. കെ. ശ്രീവത്സന്‍ എന്നിവരുടെ നേതൃത്വത്തില്‍ ആനയ്ക്ക് മരുന്നുകള്‍ നല്‍കുകയും, ആനയെ എഴുന്നേല്പിച്ച് നിര്‍ത്തുവാന്‍ ഉള്ള ശ്രമങ്ങള്‍ ആരംഭിക്കുകയും ചെയ്തു. ചെളിയും മഴയും മൂലം ആന കിടക്കുന്ന സ്ഥലം വൃത്തി രഹിതമായിരുന്നു. ഈ നിലയില്‍ കിടത്തിയാല്‍ ആനയുടെ ആരോഗ്യത്തിനു അത് ദോഷകരമാകും എന്നതിനാല്‍ വയറിനു ചുറ്റും കമ്പ കെട്ടി ക്രെയിന്‍ ഉപയോഗിച്ച് ആനയെ മാറ്റുവാന്‍ തീരുമാനിച്ചു. ക്രെയിനിന്റെ സഹായത്തോടെ ആന എഴുന്നേറ്റു നിന്നെങ്കിലും പിന്‍ കാലുകള്‍ക്ക് ബലം ഇല്ലാത്തതിനാല്‍ ശ്രമം പരാജയപ്പെട്ടു. ആനയുടെ ശരീരത്തില്‍ വ്രണങ്ങള്‍ ഉണ്ടായിരുന്നു. കൂടാതെ പുറകിലെ തുടയെല്ല് പൊട്ടിയിട്ടുള്ളതായും കരുതുന്നു. കാട്ടാന ചളിയില്‍ വീണതറിഞ്ഞ് ധാരാളം ആളുകള്‍ പ്രദേശത്ത് എത്തിയിരുന്നു.

തടിപിടിക്കുവാന്‍ ആനയെ സ്വകാര്യ  വ്യക്തിയുടെ പറമ്പില്‍ തളച്ച് പാപ്പാന്മാര്‍ സ്ഥലം കാലിയാക്കിയതോടെ ആനയുടെ പരിചരണം നാട്ടുകാര്‍ ഏറ്റെടുത്തു. പത്തനം തിട്ട വലഞ്ചുഴി വ്യാഴിക്കടവിലാണ് സംഭവം. വെള്ളിയാഴ്ച വൈകുന്നേരത്തോടെ ആനയുടെ പാപ്പാന്മാര്‍ മുങ്ങിയതിനെ തുടര്‍ന്ന് ഭക്ഷണം ലഭിക്കാതെ ആന അവശനായി. അടുത്തു ചെന്നാല്‍ ആന ആക്രമിക്കുമോ എന്ന് ആദ്യം ആരും അടുത്ത് ചെന്നില്ല. എന്നാല്‍ ആനയ്ക്ക് തളര്‍ച്ച കണ്ടതിനെ തുടര്‍ന്ന് നാട്ടുകാര്‍ സംഘടിച്ച്  പനമ്പട്ട നല്‍കി. ആനയുടെ മുന്‍ കാലും പിന്നിലെ കാലും ബന്ധിച്ചിരുന്നു.  ഉപദ്രവകാരിയല്ലെന്ന് ബോധ്യമായതിനെ തുടര്‍ന്ന് ചിലര്‍ അടുത്തു ചെന്ന് ഒരു ചരുവത്തില്‍ ആനയ്ക്ക് വെള്ളം വച്ചു കൊടുത്തു.

ആനയ്ക്കു ചുറ്റും ആളുകള്‍ കൂടിയതോടെ ചിലര്‍ സ്വയം പാപ്പന്‍ സ്ഥാനം ഏറ്റെടുക്കുവാന്‍  ശ്രമിച്ചു. എന്നാല്‍ ഭക്ഷണവും  വെള്ളവും അകത്തു ചെന്ന് അത്യാവശ്യം ഊര്‍ജ്ജം കൈവരിച്ച കൊമ്പന്‍ അവരെ വിരട്ടിയോടിച്ചു. വൈകുന്നേരത്തോടെ ഉടമയെത്തി. ഉത്തരവാദിത്വം ഇല്ലാതെ ആനയെ ഉപേക്ഷിച്ചുപോയ പാപ്പാന്മാര്‍ക്കെതിരെ നടപടി എടുക്കണമെന്ന് നാട്ടുകാര്‍ ഉടമയോട് ആവശ്യപ്പെട്ടു. ഒടുവില്‍ വേണ്ട നടപടിയെടുക്കാം എന്ന ഉറപ്പിന്മേല്‍ ഉടമ ആനയെ കൊണ്ടുപോയി.

വയനാട്: വയലിലെ ചെളിയില്‍ പുതഞ്ഞ് അവശ നിലയിലായ കാട്ടാനയെ വയനാട്ടിലെ ബത്തേരി-മൈസൂര്‍ റോഡില്‍  തമിഴ്നാടിന്റെ അതിര്‍ത്തി ഗ്രാമമായ ചെട്യാലത്തൂരില്‍  കണ്ടെത്തി. ഏകദേശം മുപ്പത് വയസ്സ് പ്രായം വരുന്ന കൊമ്പനാനയെ രാവിലെയാണ് ചെട്യാലത്തൂര്‍ ഗ്രാമവാസികള്‍ കണ്ടത്. നടക്കുവാന്‍ ആകതെ ഇഴഞ്ഞാണ് ആന നീങ്ങുന്നത്. ആനയുടെ ശരീരത്തില്‍ അവിടാവിടെ പരിക്കുകള്‍ ഉണ്ട്. കാലിന്റെ ഉള്‍വശത്ത് വ്രണം ഉണ്ട്. ഏതാനും ദിവസം മുമ്പ് ഈ കൊമ്പന്‍ കാട്ടില്‍ മുടന്തി നീങ്ങുന്നത് കണ്ടവര്‍ ഉണ്ട്.

ചുറ്റും ഘോര വനമുള്ള പ്രദേശമാണ് ചെട്യാലത്തൂര്‍. വളരെ കുറച്ച് ആളുകളെ ഈ പ്രദേശത്ത് താമസിക്കുന്നുള്ളൂ. ആന വീണതറിഞ്ഞ് നിരവധി ആളുകള്‍ ആ പ്രദേശത്തേക്ക് എത്തി. വിവരം അറിയിച്ചതിനെ തുടര്‍ന്ന് റേഞ്ച് ഓഫീസ്സര്‍ അടക്കം ഉള്ള വനം വകുപ്പ് അധികൃതരും എത്തി. തുടര്‍ന്ന് വനം വകുപ്പ് ഉദ്യോഗസ്ഥരും ഡോക്ടര്‍മാരും നാട്ടുകാരും ചേര്‍ന്ന് ആനയെ ഉയര്‍ത്തുവാന്‍ ശ്രമിച്ചെങ്കിലും കനത്ത മഴയും ചെളിയും കാരണം സാധിച്ചില്ല. ഡോക്ടര്‍മാര്‍ അനയ്ക്ക് ചികിത്സ  നല്‍കിയെങ്കിലും അവശത മൂലം ആനയ്ക്ക് കാര്യമായി ചലിക്കുവാന്‍ ആകുന്നില്ല, അവര്‍ ചികിത്സ് തുടരുന്നുണ്ട്. ആനയെ നിരീക്ഷിക്കുവാന്‍ സ്ഥലത്ത് പോലീസും, വനം വകുപ്പ് ഉദ്യോഗസ്ഥരും ക്യാമ്പ് ചെയ്യുന്നുണ്ട്. തണുപ്പ് മൂലം ആനയുടെ ശരീരത്തില്‍ പലഭാഗങ്ങളും മരവിച്ച അവസ്ഥയിലാണ്. ചെളിയില്‍ കൂടുതല്‍ സമയം കിടന്നാല്‍ അത് ആനയുടെ ആരോഗ്യത്തെ കൂടുതല്‍ ദോഷകരമായി ബാധിക്കും എന്നതിനാല്‍ കൂടുതല്‍ സന്നാഹങ്ങളോടെ ആനയെ രക്ഷപ്പെടുത്തുവാന്‍ ഉള്ള ശ്രമത്തിലാണ് ഇവര്‍.