തിരൂരങ്ങാടി പി.എസ്.എം.ഒ കോളേജ് അലുംമ്നിയുടെ ആഭിമുഖ്യത്തില്‍ ജിദ്ദയില്‍ കണ്‍വന്‍ഷന്‍ സംഘടിപ്പിച്ചു. പ്രൊഫ. ഇസ്മായീല്‍ മരുതേരി, ഡോ. റംലാ നാസര്‍, ഡോ. ടി.പി നാസര്‍, ഡോ. അഷ്റഫലി തുടങ്ങിയവര്‍ ക്ലാസെടുത്തു. സമദ് കാരാടന്‍ അധ്യക്ഷനായിരുന്നു. മുഹമ്മദ് സീതി, കെ.സി അബ്ദുറഹ്മാന്‍, പി.എം.എ ജലീല്‍, സലാഹ് കാരാടന്‍ തുടങ്ങിയവര്‍ പ്രസംഗിച്ചു.

ജിദ്ദയിലെ പത്തനംതിട്ട ജില്ലാ സംഗമത്തി‍ന്‍റെ രണ്ടാം വാര്‍ഷികം വിപുലമായ പരിപാടികളോടെ ആഘോഷിച്ചു. ഇന്ത്യന്‍ കോണ്‍സുലേറ്റിന്‍റെ സാമൂഹ്യ ക്ഷേമ വിഭാഗം കോണ്‍സുല്‍ കെ.കെ വിജയന്‍ ഉദ്ഘാടനം ചെയ്തു. പ്രവാസികളുടെ സാമ്പത്തിക സുരക്ഷ എന്ന വിഷയത്തില്‍ ഫസല്‍ കൊച്ചി ക്ലാസെടുത്തു. വിവിധ കലാപരിപാടികളും അരങ്ങേരി.

വിദേശകാര്യ മന്ത്രി എസ്.എം കൃഷ്ണ കുവൈറ്റ്, ഖത്തര്‍ എന്നീ രാജ്യങ്ങള്‍ സന്ദര്‍ശിക്കുന്നു. ഫെബ്രുവരി മൂന്നിന് കുവൈറ്റില്‍ എത്തുന്ന അദ്ദേഹം അവിടെ രണ്ട് ദിവസത്തെ സന്ദര്‍ശനം നടത്തും. ഫെബ്രുവരി ആറിനാണ് എസ്.എം കൃഷ്ണ ഖത്തര്‍ സന്ദര്‍ശിക്കുക. ഇരു രാജ്യങ്ങളുമായുള്ള സഹകരണം മെച്ചപ്പെടുത്തുന്നതിന്‍റെ ഭാഗമായാണ് സന്ദര്‍ശനം.

ലഹരിമരുന്ന് കള്ളക്കടത്തുമായി ബന്ധപ്പെട്ട് പതിനൊന്ന് ഏഷ്യന്‍ വംശജരെ ഖത്തര്‍ പ്രിവന്‍റീവ് സെക്യൂരിറ്റി ഡിപ്പാര്‍ട്ട് മെന്‍റ് പിടികൂടി. സംഘാംഗങ്ങളുടെ വസതിയില്‍ നടത്തിയ റെയ്ഡില്‍ ലഹരി വസ്തുക്കള്‍ അടങ്ങിയ 876 പാക്കറ്റുകള്‍ കണ്ടെടുത്തു. ലഹരി മരുന്ന് ഉത്പാദിപ്പിക്കുന്നതോ വിറ്റഴിക്കുന്നതോ ശ്രദ്ധയില്‍ പെട്ടാല്‍ 4471 444 എന്ന നമ്പറില്‍ വിളിച്ചറിയിക്കണമെന്ന് ഖത്തര്‍ ആഭ്യന്തര മന്ത്രാലയം അറിയിച്ചു.

ഫുജൈറയിലെ 30,000 ത്തില്‍ അധികം വരുന്ന പ്രവാസി ഇന്ത്യക്കാരെ പ്രതിനിധീകരിക്കുന്ന ഇന്ത്യന്‍ സോഷ്യല്‍ ക്ലബിന്‍റെ പുതിയ ഭാരവാഹികളെ തെരഞ്ഞെടുത്തു. ഡോ. പുത്തൂര്‍ റഹ്മാനാണ് പ്രസിഡന്‍റ്. സന്തോഷ് കെ. മത്തായിയെ ജനറല്‍ സെക്രട്ടറിയായും ശങ്കര്‍ ഭരത് രാജിനെ ട്രഷററായും തെരഞ്ഞെടുത്തു. കഴിഞ്ഞ ദിവസം ചേര്‍ന്ന ജനറല്‍ ബോഡിയോഗത്തില്‍ ഐക്യകണ്ഠേനയാണ് തെരഞ്ഞെടുപ്പ് നടന്നത്.