ദുബായ്‌ : ഏഷ്യാ വിഷനും റേഡിയോ ഏഷ്യയും ചേര്‍ന്ന് നടത്തിയ ആഗോള വോട്ടെടുപ്പിന്റെ അടിസ്ഥാനത്തില്‍ ലോകത്തിലെ ഏറ്റവും പ്രശസ്തനായ മലയാളിയായി മമ്മുട്ടിയും ലോകത്തിലെ ഏറ്റവും പ്രശസ്തനായ എന്‍. ആര്‍. ഐ. ആയി പദ്മശ്രീ എം. എ. യൂസഫലിയും തെരഞ്ഞെടുക്കപ്പെട്ടു. അവസാന റൌണ്ടില്‍ ശശി തരൂര്‍, വി. എസ്. അച്യുതാനന്ദന്‍, മോഹന്‍ലാല്‍, മാധവന്‍ നായര്‍, യേശുദാസ്‌, റസൂല്‍ പൂക്കുട്ടി എന്നിവരെ പിന്തള്ളിയാണ് മമ്മുട്ടിയെ തെരഞ്ഞെടുത്തത്. ലക്ഷ്മി മിത്തല്‍, മാധുരി ദീക്ഷിത് എന്നിവരെയാണ് എം.കെ. ഗ്രൂപ്പ് മാനേജിംഗ് ഡയറക്ടറും പ്രമുഖ വ്യവസായിയുമായ പദ്മശ്രീ യൂസഫലി പരാജയപ്പെടുത്തിയത്.
മെയ്‌ 14ന് ദുബായ്‌ ഫെസ്റ്റിവല്‍ സിറ്റിയിലെ അന്താരാഷ്‌ട്ര വേദിയില്‍ നടക്കുന്ന രണ്ടാമത് ഏഷ്യന്‍ ടെലിവിഷന്‍ അവാര്ഡ് നൈറ്റില്‍ പുരസ്കാരങ്ങള്‍ സമ്മാനിക്കും. യു. എ. ഇ. സര്‍ക്കാരിന്റെ പ്രതിനിധികളും ചടങ്ങില്‍ സംബന്ധിക്കും എന്ന് ഏഷ്യാ വിഷന്‍ മാനേജിംഗ് ഡയറക്ടര്‍ നിസ്സാര്‍ സയിദ്‌ അറിയിച്ചു.
ദുബായ്‌ ആസ്ഥാനമായുള്ള ഏഷ്യാ വിഷന്‍ അഡ്വര്‍ട്ടൈസിംഗ് ഗള്‍ഫിലെ ആദ്യത്തെ മലയാളം റേഡിയോ സ്റ്റേഷനായ റേഡിയോ ഏഷ്യയും, ലെന്‍സ്‌മാന്‍ പ്രോഡക്ഷന്‍സും ചേര്‍ന്നാണ് അവാര്ഡ് സംഘടിപ്പിക്കുന്നത്. ഏഷ്യാ വിഷന്‍ അഡ്വര്‍ട്ടൈസിംഗ് എല്ലാ വര്‍ഷവും മലയാള സിനിമാ അവാര്ഡ്, ബിസിനസ് അവാര്ഡ്, ടെലിവിഷന്‍ അവാര്ഡ് എന്നിവ സംഘടിപ്പിക്കാറുണ്ട്.
യു.എ.ഇ. കൂടാതെ ഇന്ത്യ സൗദി അറേബ്യ എന്നിവിടങ്ങളില്‍ സാന്നിധ്യമുള്ള ഏഷ്യാ വിഷന്‍,ടി.വി. ചാനല്‍ മാനേജ്മെന്റ്, റേഡിയോ മാനേജ്മെന്റ്, കണ്‍സള്‍ട്ടന്സി, അഡ്വര്‍ട്ടൈസിംഗ്, പ്രൊഡക്ഷന്‍, ഇവന്റ് മാനേജ്മെന്റ് എന്നീ മേഖലകളിലും സജീവമാണ്.
ന്യുഡല്‍ഹി : ശ്രുതി ആര്‍ട്ട്സും ഡല്‍ഹി പഞ്ചവാദ്യ ട്രസ്റ്റും സംയുക്തമായി നല്‍കുന്ന വേള്‍ഡ്‌ മലയാളി എക്സലന്‍സി അവാര്ഡ് (World Malayali Excellency Award – 2010) യു.എ.ഇ. യിലെ പ്രമുഖ മാധ്യമ പ്രവര്‍ത്തകനും കലാ സാംസ്ക്കാരിക രംഗത്തെ സജീവ സാന്നിദ്ധ്യവുമായ ആല്‍ബര്‍ട്ട് അലക്സിന് സമ്മാനിച്ചു. ഏപ്രില്‍ 11, 2010ന് ന്യൂഡല്‍ഹിയില്‍ വെച്ച് നടന്ന പുരസ്കാര ദാന ചടങ്ങില്‍, പ്രമുഖ രാഷ്ട്രീയ സാംസ്ക്കാരിക നേതാക്കളുടെ സാന്നിധ്യത്തില്‍, സിനിമാ നടനും സംവിധായകനുമായ ശ്രീനിവാസനില്‍ നിന്നും അദ്ദേഹം പുരസ്കാരം ഏറ്റു വാങ്ങി. 
ദുബായ്‌ : ഗള്‍ഫിലെ മാധ്യമ പ്രവര്‍ത്തകര്‍ക്ക് ചിരന്തന സാംസ്കാരിക വേദി വര്ഷം തോറും നല്‍കി വരുന്ന ചിരന്തന മാധ്യമ പുരസ്കാരത്തിന് സിറാജ് ദിനപത്രം ഗള്‍ഫ്‌ എഡിഷന്‍ എഡിറ്റര്‍ ഇന്‍ ചാര്‍ജ്ജ്‌ കെ. എം. അബ്ബാസിനെയും, മലയാള മനോരമ ന്യൂസിലെ ഗള്‍ഫ്‌ റിപ്പോര്‍ട്ടര്‍ എന്‍. എം. അബൂബക്കറിനെയും തെരഞ്ഞെടുത്തു. പ്രവാസികളുടെ പ്രശ്നങ്ങളില്‍ ഊന്നിയുള്ള പത്ര പ്രവര്‍ത്തനം നടത്തി ഒട്ടേറെ സാമൂഹ്യ ഇടപെടലുകള്‍ക്ക്‌ വഴി വെക്കുകയും നിരവധി അടിയന്തിര പ്രശ്നങ്ങള്‍ക്ക് പരിഹാരം ഉണ്ടാക്കുകയും ചെയ്ത ഇവരുടെ ശ്രമങ്ങള്‍ ഇടവും വിലപ്പെട്ടതാണെന്ന് ചിരന്തന പ്രസിഡണ്ട് പുന്നക്കന്‍ മുഹമ്മദലി, ജനറല്‍ സെക്രട്ടറി വി. പി. അലി മാസ്റ്റര്‍ എന്നിവര്‍ പുരസ്കാരങ്ങള്‍ പ്രഖ്യാപിച്ചു കൊണ്ട് പറഞ്ഞു.
അബുദാബി : ഇത്തിസാലാത്ത് കസ്റ്റമര്‍ സര്‍വീസില്‍ ജോലി ചെയ്യുന്ന സാലിഹ് കല്ലടയ്ക്ക് ഇത്തിസാലാത്തിന്റെ “ബെസ്റ്റ് സ്റ്റാഫ് ” അവാര്ഡ് ലഭിച്ചു . ഏറനാടന്‍ എന്ന പേരില്‍ ബൂലോകത്ത് പ്രശസ്തനായ സാലിഹ് കല്ലട, കഴിഞ്ഞ ഒന്നര വര്‍ഷമായി അബുദാബിയിലെ ഇത്തിസാലാത്ത് കസ്റ്റമര്‍ സര്‍വീസില്‍ പരാതികള്‍ സ്വീകരിക്കുകയും പരിഹരിക്കുകയും ചെയ്യുന്ന വിഭാഗത്തില്‍ ജോലി ചെയ്തു വരുന്നു. വാര്‍ഷിക കണക്കെടുപ്പില്‍, കഴിഞ്ഞ കൊല്ലം ഉപഭോക്താക്കളുടെ പരാതികള്‍ സ്വീകരിച്ചതില്‍, പരമാവധി എണ്ണം പരിഹരിച്ചു കൊടുത്തിട്ടുള്ള ഓഫീസര്‍ എന്ന പരിഗണന കൊണ്ടാണ് സാലിഹിന് ഈ നേട്ടം കൈ വരിക്കാനായത്.
