തിരുവനന്തപുരം: സികെ ചന്ദ്രപ്പന്‌ അന്തരിച്ചതിനാല്‍  സിപിഐ സംസ്ഥാന സെക്രെട്ടറിയായി കെ ഇ ഇസ്മായിലോ കാനം രാജേന്ദ്രനോ ആകാന്‍ കൂടുതല്‍ സാദ്ധ്യത. ഇവരെ കൂടാതെ സി. ദിവാകരന്‍, പന്ന്യം രവീന്ദ്രന്‍ എന്നിവരാണ് സാദ്ധ്യതാ ലിസ്റ്റില്‍ ഉള്‍പെട്ടവര്‍. എന്നാല്‍ ദിവാകരന്‍ നിയമസഭാ കക്ഷി നേതാവായതിനാലും പന്ന്യം രവീന്ദ്രന്‍ ദേശീയ സെക്രട്ടേറിയേറ്റില്‍ ഉള്‍പ്പെട്ടതിനാലും ഇവരുടെ സാദ്ധ്യത മങ്ങി. പുതിയ സംസ്‌ഥാന സെക്രട്ടറി ആരായിയിരിക്കും എന്നത് നാളെ അറിയാമെന്നു സിപിഐ ജനറല്‍ സെക്രട്ടറി സുധാകരറെഡ്‌ഡി വ്യക്‌തമാക്കി. ഉന്നതതല സമിതി കൂടി തീരുമാനം എടുക്കുന്നതിനായി കേന്ദ്രനേതാക്കള്‍ തിരുവനന്തപുരത്തെത്തി. ജനകീയ സമരങ്ങള്‍ ഏറ്റെടുക്കുമെന്നും ഇടത്‌ ഐക്യം ശക്‌തിപ്പെടുത്തുമെന്നും സുധാകരറെഡ്‌ഡി പറഞ്ഞു.

കോഴിക്കോട്:ഇടതുപക്ഷ ജനാധിപത്യ ശക്തികള്‍ക്ക് മാത്രമേ  കോണ്‍ഗ്രസ്, ബി. ജെ. പി മുന്നണികള്‍ക്ക് ബദലാകാന്‍ സാധ്യമാവൂ എന്ന് സി. പി. എം ജനറല്‍ സെക്രട്ടറി പ്രകാശ്‌ കാരാട്ട് . ഇടതു ജനാധിപത്യ സഖ്യമുണ്ടാക്കാനും ബദല്‍ രൂപപ്പെടുത്താനും രാജ്യമാകെ സി. പി. എമ്മിന്റെ അടിത്തറയും സ്വാധീനവും ശക്തമാവേണ്ടതുണ്ടെന്ന് ടാഗോര്‍ സെന്റനറിഹാളില്‍ 200ം പാര്‍ട്ടി കോണ്‍ഗ്രസിന്റെ പ്രതിനിധി സമ്മേളനം ഉദ്ഘാടനം ചെയ്തുകൊണ്ട് കാരാട്ട് പറഞ്ഞു.  ജനം പുതിയൊരു ബദലിനെ തേടുകയാണ്. ഇതിനായി എല്ലാ വിഭാഗം ജനങ്ങളുടെയും കൂട്ടായ മുന്നേറ്റങ്ങളും പ്രക്ഷോഭങ്ങളും പാര്‍ട്ടി ഏറ്റെടുക്കും.സാമൂഹിക അടിച്ചമര്‍ത്തല്‍ നേരിടുന്ന ദളിതുകളുടെയും ആദിവാസികളുടെയും സ്ത്രീകളുടെയും ന്യൂനപക്ഷങ്ങളുടെയും ആവശ്യങ്ങള്‍ക്ക് വേണ്ടി പാര്‍ട്ടി പോരാടും. ജനകീയ പ്രശ്നങ്ങളില്‍ മറ്റു മതേതര ജനാധിപത്യ കക്ഷികളുമായി സഹകരിക്കും. അതേസമയം പാര്‍ട്ടിയുടെ വിപ്ലവപാത രൂപപ്പെടുത്തുന്നത് മാര്‍ക്സിസം-ലെനിനിസത്തില്‍ നിന്ന് വ്യതിചലിക്കാതെ ഇന്ത്യയിലെ സാഹചര്യങ്ങള്‍ക്കനുസരിച്ചാണെന്നും ഇക്കാര്യത്തില്‍ വിദേശ മാതൃകകളെ ഒരിക്കലും പാര്‍ട്ടി അനുകരിച്ചിട്ടില്ലെന്നും പ്രകാശ് കാരാട്ട് വ്യക്തമാക്കി.