റിയാദ് : റിയാദിലെ ബത്തയില് ഉണ്ടായ തീപിടിത്തത്തില് മരിച്ചവരുടെ കുടുംബത്തിന് എം. കെ. ഗ്രൂപ്പ് മാനേജിംഗ് ഡയറക്ടര് എം. എ. യൂസഫലി ഒരു ലക്ഷം സൗദി റിയാല് സഹായം നല്കി. മരിച്ച 6 ഇന്ത്യന് തൊഴിലാളികളുടെ കുടുംബത്തിന് 17,200 റിയാല് വീതം ലഭിച്ചപ്പോള് തീപിടിത്തത്തില് മരിച്ച ഒരു നേപ്പാള് സ്വദേശിയുടെ കുടുംബത്തിനെയും അദ്ദേഹം രണ്ടു ലക്ഷം നേപ്പാളീസ് രൂപ നല്കി സഹായിച്ചു.
അല് ബത്തയിലുള്ള അല് സാലിം സൂപ്പര്മാര്ക്കറ്റിന് മുകളിലുള്ള താമസ സ്ഥലത്ത് ഉണ്ടായ തീപ്പിടിത്തത്തില് അബ്ദുറഹീം (തൃശ്ശൂര്), സുലൈമാന്, അഹമ്മദ് കബീര് (നിലമ്പൂര്), സജിത് (മാവേലിക്കര), അജിത് (എറണാകുളം) എന്നിവര്ക്കൊപ്പം മംഗലാപുരം സ്വദേശി മുഹമ്മദ്, നേപ്പാള് സ്വദേശി സലാഹി രാജേഷ് എന്നിവരും മരണമടഞ്ഞു.
വിശുദ്ധ കഅബ കഴുകല് ചടങ്ങില് പങ്കെടുക്കാന് വിശുദ്ധ നഗരത്തില് എത്തിയ പത്മശ്രീ എം. എ. യൂസഫലി അപകട വാര്ത്ത കേട്ട ഉടനെ തന്നെ ഇവരുടെ കുടുംബങ്ങളെ സഹായിക്കാനുള്ള തീരുമാനം എടുക്കുകയായിരുന്നു.
ദുബായ് : മംഗലാപുരം വിമാന ദുരന്തത്തില് മരിച്ചവരുടെ ആശ്രിതര്ക്ക് നഷ്ട പരിഹാര തുക വിതരണം ചെയ്യുന്നതില് റിലയന്സ് കമ്പിനിയെ സഹായിക്കാന് എയര് ഇന്ത്യ നടത്തുന്ന കള്ളക്കളി അവസാനിപ്പിച്ച് അര്ഹമായ നഷ്ട പരിഹാര തുക എത്രയും പെട്ടെന്ന് വിതരണം ചെയ്യാന് നടപടി സ്വീകരിക്കണമെന്നും, അന്താരാഷ്ട്ര മാനദണ്ഡങ്ങള് കാറ്റില് പറത്തി ക്കൊണ്ട് എയര് ഇന്ത്യ നടത്തുന്ന ഈ വഞ്ചന അന്തര്ദേശീയ തലത്തില് ഇന്ത്യയുടെ യശ്ശസിന് തന്നെ കോട്ടം തട്ടുന്നതാണെന്നും ഇത് ഇന്ത്യയ്ക്ക് അപമാനമാണെന്നും ദുബായ് കെ. എം. സി. സി. കാസര്കോട് മണ്ഡലം കമ്മിറ്റി ഭാരവാഹികളുടെ യോഗം അഭിപ്രായപ്പെട്ടു.
