ദുബായ്‌ : ദുബായില്‍ നിന്നും കൊച്ചിയിലേക്ക്‌ പോകുന്ന എയര്‍ ഇന്ത്യാ എക്സ്പ്രസ് വിമാനം മണിക്കൂറുകളോളം വൈകിയത് യാത്രക്കാരെ ഏറെ വലച്ചു. ഇന്നലെ രാത്രി പന്ത്രണ്ടു മണിക്ക് പുറപ്പെടേണ്ട വിമാനമാണ് അനിശ്ചിതമായി യാത്ര മാറ്റി വെച്ചത്. കൊച്ചിയില്‍ നിന്നും വരേണ്ട വിമാനം എത്തിയിട്ടില്ല എന്നതായിരുന്നു ഔദ്യോഗിക വിശദീകരണം. ബാഗേജ് ചെക്ക്‌ ഇന്‍ കഴിഞ്ഞു സുരക്ഷാ പരിശോധനകളും കഴിഞ്ഞു യാത്രക്കാര്‍ വിമാനത്തില്‍ കയറാനായി തയ്യാര്‍ എടുക്കവെയാണ് വിമാനം വൈകിയേ പോകൂ എന്ന അറിയിപ്പ് ലഭിക്കുന്നത്. നേരത്തേ വിവരം ലഭിച്ചിരുന്നു എങ്കില്‍ രാത്രിയിലെ ഉറക്കം നഷ്ടപ്പെടുത്തി കുഞ്ഞുങ്ങളെയും കൊണ്ട് വിമാന താവളത്തിലെ കാത്തിരിപ്പ്‌ ഒഴിവാക്കാമായിരുന്നു എന്ന് യാത്രക്കാര്‍ അഭിപ്രായപ്പെട്ടു. അനിശ്ചിതമായി തുടര്‍ന്ന കാത്തിരിപ്പ്‌ നാല് മണിക്കൂര്‍ വരെ നീണ്ടതിനു ശേഷമാണ് അവസാനം നാലരക്ക് വിമാനം കൊച്ചിയിലേക്ക്‌ പുറപ്പെട്ടത്‌.
ദുബായ്‌ : മംഗലാപുരം വിമാന ദുരന്തത്തില്‍ മരിച്ചവരുടെ ആശ്രിതര്‍ക്ക്‌ നഷ്ട പരിഹാര തുക വിതരണം ചെയ്യുന്നതില്‍ റിലയന്‍സ്‌ കമ്പിനിയെ സഹായിക്കാന്‍ എയര്‍ ഇന്ത്യ നടത്തുന്ന കള്ളക്കളി അവസാനിപ്പിച്ച്‌ അര്‍ഹമായ നഷ്ട പരിഹാര തുക എത്രയും പെട്ടെന്ന്‌ വിതരണം ചെയ്യാന്‍ നടപടി സ്വീകരിക്കണമെന്നും, അന്താരാഷ്ട്ര മാനദണ്ഡങ്ങള്‍ കാറ്റില്‍ പറത്തി ക്കൊണ്ട്‌ എയര്‍ ഇന്ത്യ നടത്തുന്ന ഈ വഞ്ചന അന്തര്‍ദേശീയ തലത്തില്‍ ഇന്ത്യയുടെ യശ്ശസിന്‌ തന്നെ കോട്ടം തട്ടുന്നതാണെന്നും ഇത് ഇന്ത്യയ്ക്ക്‌ അപമാനമാണെന്നും ദുബായ്‌ കെ. എം. സി. സി. കാസര്‍കോട്‌ മണ്ഡലം കമ്മിറ്റി ഭാരവാഹികളുടെ യോഗം അഭിപ്രായപ്പെട്ടു.
