ദുബായ് : വിനോദ സഞ്ചാരികളുടെ ആഗോള സംഗമ ഭൂമിക യായ ഗ്ലോബൽ വില്ലേജ്, 2026 മെയ് 31 വരെ പ്രവർത്തിക്കും എന്ന് അധികൃതർ. ഈ വർഷത്തെ ബലി പെരുന്നാൾ അവധി ദിനങ്ങൾ ഗ്ലോബൽ വില്ലേജിൽ ആഘോഷിക്കുവാൻ പ്രവാസികൾക്ക് അവസരമാവും.
ഞായർ മുതൽ വ്യാഴം വരെ വൈകുന്നേരം 5 മണി മുതൽ രാത്രി 12 മണി വരെയും വെള്ളി, ശനി ദിവസ ങ്ങളിൽ വൈകുന്നേരം 5 മണി മുതൽ പുലർച്ചെ ഒരു മണി വരെയുമാണ് ഗ്ലോബൽ വില്ലേജിന്റെ നിലവിലെ പ്രവർത്തന സമയം.
30 ദിർഹം എൻട്രി ഫീസ് നിരക്ക് ഏർപ്പെടുത്തിയിട്ടുണ്ട് എങ്കിലും ഫാമിലി ഓഫർ ടിക്കറ്റുകളിലൂടെ ഒരു കുടുംബത്തിലെ നാലു പേർക്ക് 30 ദിർഹത്തിനു പ്രവേശന ടിക്കറ്റുകളും ലഭ്യമാണ്. ഇതിന്റെ വിശദ വിവരങ്ങൾക്ക് വെബ് സൈറ്റ് സന്ദർശിക്കാം.
വിനോദത്തിനും വിജ്ഞാനത്തിനും വ്യാപാരത്തിനും പോലെ ഒരു സാംസ്കാരിക കേന്ദ്രം കൂടിയാണ് ആഗോള ഗ്രാമം.
ലോക രാജ്യങ്ങളെ അടുത്തറിയാൻ കഴിയും വിധം 30 പവലിയനുകളിൽ 3500 ഓളം വ്യാപാര കേന്ദ്രങ്ങൾ, ഭക്ഷ്യ വിഭവങ്ങൾ രുചിച്ചറിയാൻ റെസ്റ്റോറന്റുകൾ. വിനോദ പരിപാടികൾ, സാഹസിക റൈഡുകൾ തുടങ്ങി എല്ലാ വിഭാഗം സന്ദർശകരെയും ഒരു പോലെ ആകർഷിക്കും വിധമാണ് ഗ്ലോബൽ വില്ലേജ് രൂപ കൽപ്പന ചെയ്തിരിക്കുന്നത്. നിലവിൽ ഇവിടത്തെ എല്ലാ റൈഡുകളും 99 ദിർഹം നിരക്കിൽ ആസ്വദിക്കാം.
