റിയാദ്‌ : സ്ത്രീകള്‍ പൊതു സ്ഥലങ്ങളില്‍ ജോലി ചെയ്യുന്നതിനെതിരെ സൌദിയിലെ മത പുരോഹിതര്‍ ഫത്വ പുറപ്പെടുവിച്ചു. സ്ത്രീകള്ക്ക് തൊഴില്‍ സാദ്ധ്യതകള്‍ വര്‍ദ്ധിപ്പിച്ചു കൊണ്ടുള്ള സര്‍ക്കാര്‍ നയത്തിന് എതിരെയാണ് പ്രസ്തുത ഫത്വ. സ്ത്രീകള്‍ സൂപ്പര്‍ മാര്‍ക്കറ്റുകളിലും മറ്റും കാഷ്‌ കൌണ്ടറുകളില്‍ ജോലി ചെയ്യരുത്‌ എന്ന് ഫത്വ വ്യക്തമാക്കുന്നു. പുരുഷന്മാര്‍ ഒത്തു കൂടുന്ന ഇടങ്ങളില്‍ നിന്നും സ്ത്രീകള്‍ അകന്നു നില്‍ക്കണം. പുരുഷന്മാരുമായി സ്ത്രീകള്‍ ഇട കലരാന്‍ പാടില്ല. പുരുഷന്മാരെ ആകര്ഷിക്കാതെയും പുരുഷന്മാരാല്‍ ആകൃഷ്ടരാകാത്തെയും ജോലി ചെയ്യാന്‍ കഴിയുന്ന മാന്യമായ തൊഴില്‍ മാത്രമേ സ്ത്രീകള്‍ ചെയ്യാന്‍ പാടുള്ളൂ എന്നും ഫത്വയില്‍ വ്യക്തമാക്കുന്നുണ്ട്.
കുവൈറ്റ് : കുവൈറ്റ് കേരളാ ഇസ്ലാഹി സെന്റര് ഖുര്‍ആന്‍ ഹദീസ് ലേര്ണിംഗ് വിഭാഗം കുവൈത്ത് മലയാളി കള്‍ക്കായി സംഘടിപ്പിച്ചു വരുന്ന ഖുര്‍ആന്‍ വിജ്ഞാന പരീക്ഷയുടെ പതിനാലാം ഘട്ട പരീക്ഷയുടെ പഠന ക്ലാസ്സുകള്‍ ഫര്‍വാനിയ ദാറുല്‍ ഖുര്‍ആനില്‍ സംഘടിപ്പിക്കുന്നതായി ഭാരവാഹികള്‍ പത്രക്കുറിപ്പില്‍ അറിയിച്ചു. പുരുഷന്മാര്ക്ക് എല്ലാ തിങ്കളാഴ്ച വൈകീട്ട് 7.30 മണിക്കും സ്ത്രീകള്ക്ക് എല്ലാ ശനിയാഴ്ച വൈകുന്നേരം 4 മണിക്കും ആയിരിക്കും ക്ലാസ്സുകള്‍. മുഹമ്മദ് അമാനി മൗലവി രചിച്ച പരിശുദ്ധ ഖുര്‍ആന്‍ പരിഭാഷയുടെ 42, 43, 44 അദ്ധ്യായങ്ങളായ അശ്ശൂറ, അസ്സുഖ്റുഫ്, അദ്ദുഖാന്‍ അടിസ്ഥാന മാക്കി നടത്തുന്ന പരീക്ഷയില്‍ ഒബ്ജക്ടിവ് ടൈപ്പ് ചോദ്യങ്ങളാ യിരിക്കും ഉണ്ടായിരിക്കുക. 
