അബുദാബി : പ്രമുഖ ഫാസ്റ്റ് ഫുഡ് ശൃംഖല ഫ്രൈസ് & ഫ്ലയിംസ് ചിക്കൻ (എഫ്. എഫ്. സി.) റസ്റ്റോറന്‍റ് യു. എ. ഇ. യിലെ ആദ്യ ബ്രാഞ്ച് അബുദാബി മുസഫ ഷാബിയ (10) യിലെ അല്‍ റായ് സ്ട്രീറ്റില്‍ തുടക്കം കുറിച്ചു. ലുലു ഗ്രൂപ്പ് ചെയർമാനും മാനേജിംഗ് ഡയറക്ടറുമായ എം. എ. യൂസഫലി ആദ്യ സംരംഭം ഉദ്ഘാടനം ചെയ്തു. പ്രമുഖ ആർ. ജെ. യും നടനും ടെലി വിഷന്‍ അവതാരകനുമായ മിഥുൻ രമേശ് മുഖ്യാതിഥിയായി സംബന്ധിച്ചു.
ഫ്രൈസ് ആൻഡ് ഫ്ലയിംസ് ചിക്കൻ (യു. എ. ഇ.) ചെയർമാൻ ടി. എ. ഉമർ, സി. എം. നൗഷാദ് (സി. ഇ. ഒ.), മുഹമ്മദ് അറക്കൽ (എം. ഡി.), പി. കെ. സലീം (ഡയറക്ടർ) എന്നിവരും അബുദാബി യിലെ സാമൂഹ്യ സാംസ്കാരിക പ്രവർത്തകരും വിവിധ സംഘടനാ ഭാരവാഹികളും മാധ്യമ പ്രവര്‍ത്തകരും ചടങ്ങിൽ സംബന്ധിച്ചു.
എം. എ. യൂസഫലി എഫ്. എഫ്. സി. റസ്റ്റോറന്‍റ്
മാനേജ്മെന്റ് ടീമിനൊപ്പം
ഗുണമേന്മയോടെ വൈവിധ്യമാർന്ന ഭക്ഷണമാണ് ഇവിടെ മിതമായ നിരക്കിൽ ഒരുക്കിയിട്ടുള്ളത് എന്ന് എഫ്. എഫ്. സി. മാനേജ്മെന്റ് അറിയിച്ചു. ആരോഗ്യ സംരക്ഷണത്തിന് പ്രവാസികൾ നൽകുന്ന പ്രാധാന്യം വർദ്ധിച്ചു വരുന്നതിനാൽ ഓർഗാനിക് വിഭവങ്ങളും വിവിധ തരം ജ്യൂസുകളും ഫ്രൈസ് ആൻഡ് ഫ്ലയിംസ് ചിക്കൻ റസ്റ്റോറന്‍റില്‍ ഉൾപ്പെടുത്തിയിട്ടുണ്ട്.
തൃശൂർ ജില്ലയിലെ തൃപ്രയാറിൽ എഫ്. എഫ്. സി. യുടെ ആദ്യ ബ്രാഞ്ച് തുടക്കം കുറിച്ചതും പദ്‌മശ്രീ എം. എ. യൂസഫലി തന്നെ ആയിരുന്നു. കേരളത്തിൽ നിലവിൽ 35 ശാഖകൾ പ്രവർത്തിക്കുന്നു. ഇപ്പോൾ ഇന്ത്യക്ക് പുറത്ത് ആദ്യമായി അബുദാബിയിലാണ് പ്രവർത്തനം ആരംഭിക്കുന്നത്. തുടർന്ന് യു. എ. ഇ. യിലെ വിവിധ എമിറേറ്റുകളിലും മറ്റു ജി. സി. സി. രാജ്യങ്ങളിലും ഫ്രൈസ് ആൻഡ് ഫ്ലയിംസ് ചിക്കൻ റസ്റ്റോറന്‍റ് ശാഖകൾ തുറക്കുവാൻ പദ്ധതി ഉണ്ടെന്നും എഫ്. എഫ്. സി. മാനേജ്മെന്റ് അറിയിച്ചു.
