അബുദാബി : ഭൌമ ദിനത്തോട് അനുബന്ധിച്ച് കേരള സോഷ്യല്‍ സെന്ററില്‍ എന്‍. പി. സി. സി. യുടെ കേരള കള്‍ച്ചര്‍ ഫോറത്തിന്റെ നേതൃത്വത്തില്‍ നടത്തിയ കുട്ടികള്‍ക്കായുള്ള ചിത്ര രചനാ മത്സരത്തില്‍ നൂറോളം കുട്ടികള്‍ പങ്കെടുത്തു. മത്സരത്തിന്റെ ഉദ്ഘാടനം പ്രശസ്ത നോവലിസ്റ്റ് ടി. ഡി. രാമകൃഷ്ണന്‍ നിര്‍വഹിച്ചു.
രാജ്യ വ്യാപകമായി എന്ഡോസള്ഫാന് നിരോധിക്കണമെന്ന് ആവശ്യപെട്ടു പ്രതീകാത്മകമായി വലിയ ക്യാന്‍വാസില്‍ നിരവധി പേര്‍ ഒപ്പു വെച്ചു. ആദ്യ ഒപ്പ് ടി. ഡി. രാമകൃഷ്ണന്‍ നിര്‍വഹിച്ചു.
അഷ്‌റഫ്‌ ചെമ്പാട്, ഗോമസ്, അനില്‍കുമാര്‍, മുസ്തഫ, മുഹമ്മദ്‌ കുഞ്ഞി, അജി രാധാകൃഷ്ണന്‍, രാജീവ്‌ മുളക്കുഴ എന്നിവര്‍ പരിപാടിക്ക് നേതൃത്വം നല്‍കി. ചിത്ര രചനാ മത്സര വിജയികള്‍ക്ക് കൈരളി കള്‍ച്ചര്‍ ഫോറത്തിന്റെ പത്താം വാര്‍ഷികമായ ഏപ്രില്‍ 28നു കെ. എസ്. സി. യില്‍ വെച്ച് നടക്കുന്ന ഭാരതീയം ഷോയില്‍ വെച്ച് സമ്മാന ദാനം നിര്‍വഹിക്കും.
ദുബായ്‌ : അഴിമതിയ്ക്കെതിരെ ഗാന്ധിയന്‍ സത്യാഗ്രഹം അനുഷ്ഠിക്കുന്ന അണ്ണാ ഹസാരേയ്ക്ക് e പത്രം പരിസ്ഥിതി ക്ലബ്‌ പിന്തുണ പ്രഖ്യാപിച്ചു. ലക്ഷ്യം നേടിയില്ലെങ്കില്‍ മരിക്കുക എന്ന പ്രഖ്യാപനവുമായി അഴിമതി ക്കെതിരെ സന്ധിയില്ലാ സമരം ചെയ്യുന്ന ഗാന്ധിയനും സാമൂഹിക പ്രവര്‍ത്തകനുമായ അന്നാ ഹസാരെയുടെ നിരാഹാര സത്യാഗ്രഹം മൂന്നു നാള്‍ പിന്നിടുമ്പോള്‍ ലോകമെമ്പാടുമുള്ള ഇന്ത്യാക്കാരോടൊപ്പം ഈ സമരത്തില്‍ പങ്കെടുക്കുകയാണ് എന്ന് e പത്രം പരിസ്ഥിതി സംഘം പ്രവര്‍ത്തകര്‍ അറിയിച്ചു. മുംബൈ, ദില്ലി എന്നിവിടങ്ങളില്‍ ജനങ്ങള്‍ സ്വീകരിച്ച “വെളുത്ത വസ്ത്ര” കാമ്പെയിനില്‍ എല്ലാവരും പങ്കെടുത്ത് അണ്ണാ ഹസാരെയുടെ സമരത്തിന്‌ ഐക്യദാര്‍ഡ്യം പ്രകടിപ്പിക്കണം എന്നും ഇന്നലെ പുറത്തിറക്കിയ പ്രസ്താവനയില്‍ പറയുന്നു.
