ബഹറൈന് മനാമ: സിക്സ് വീലര് പിക്കപ്പ് നിയന്ത്രണംവിട്ട് നിര്ത്തിയിട്ട കണ്ടെയിനറിന് പിന്നില് ഇടിച്ച് മലയാളി ഉള്പ്പെടെ രണ്ട് ഇന്ത്യക്കാര് മരിച്ചു. കുന്ദംകുളം കൊരട്ടിക്കര മൂത്തേടത്ത് ഭരതന് (51), പഞ്ചാബ് സ്വദേശി കലാ മൊഹീന്ദര് (45) എന്നിവരാണ് മരിച്ചത്. ഇന്നലെ വൈകുന്നേരം 3.30നായിരുന്നു അപകടം. അസ്കറിലെ ബ്രാംകോ കമ്പനിയിലെ കണ്സ്ട്രക്ഷന് വിഭാഗം തൊഴിലാളികളാണ് മരിച്ച ഭരതനും മൊഹീന്ദറും. ഭരതന് ഈമാസം ലീവില് നാട്ടില് പോകാന് തയ്യാറെടു ക്കുകയായിരുന്നു. നാട്ടിലേക്ക് കൊണ്ടുപോകാനുള്ള സാധനങ്ങള്വരെ മുറിയില് ഒരുക്കിവെച്ചിരുന്നു. ഭരതന് ഭാര്യയും രണ്ട് കുട്ടികളുമുണ്ട്. അസ്കറിലെ കമ്പനിയില്നിന്ന് ജോലി കഴിഞ്ഞ് അല്ബയിലെ താമസ സ്ഥലത്തേക്ക് വരുമ്പോള് അല്ബ സിഗ്നലിന് സമീപം വെച്ചാണ് അപകടം സംഭവിച്ചത്.ബംഗ്ലാദേശ് സ്വദേശിയായ ഡ്രൈവര് പരിക്കേല്ക്കാതെ രക്ഷപ്പെട്ടു. ഇയാളെ പൊലീസ് അറസ്റ്റ് ചെയ്തു.
