രാഷ്ട്രീയക്കാരെയും, മേലധികാരികളേയും കൂസാത്ത കിടിലന്‍ ഡയലോഗുകളും, സ്റ്റണ്ട് രംഗങ്ങളും കൊണ്ട് പ്രേക്ഷകരെ ഹരം കൊള്ളിച്ച കമ്മീഷണര്‍ ഭരത് ചന്ദ്രന്‍ ഐ. പി. എസ്. വീണ്ടും പ്രേക്ഷകര്‍ക്ക് മുമ്പില്‍ എത്തുന്നു. വന്‍ വിജയമായിരുന്ന കമ്മീഷണര്‍ എന്ന ചിത്രം നടന്‍ സുരേഷ് ഗോപി, സംവിധായകന്‍ ഷാജി കൈലാസ്, രചയിതാവ് രണ്‍ജി പണിക്കര്‍ എന്നിവരുടെ കരിയറിലെ വഴിത്തിരി വായിരുന്നു. പിന്നീട് ദി കിങ്ങ്, നരസിംഹം, ആറാം തമ്പുരാന്‍ തുടങ്ങിയ ചിത്രങ്ങള്‍ ഒരുക്കിയ ഷാജി കൈലാസ് മലയാളത്തിലെ ഏറ്റവും വിലപിടിപ്പുള്ള സംവിധായകരുടെ പട്ടികയില്‍ ഇടം പിടിച്ചു.
കമ്മീഷണര്‍ ഇറങ്ങി വര്‍ഷങ്ങള്‍ക്കു ശേഷം തിരക്കഥാകൃത്ത് രണ്‍ജി പണിക്കര്‍ ഭരത് ചന്ദ്രന്‍ ഐ. പി. എസ്. എന്ന പേരില്‍ രണ്ടാം ഭാഗം ഒരുക്കിയിരുന്നു, ഇതും വന്‍ വിജയമായി. ഒരു ഇടവേളയ്ക്കു ശേഷം സുരേഷ് ഗോപിയുടെ രണ്ടാം വരവിനു ഇത് വഴിയൊരുക്കി.
ഇത്തവണ കമ്മീഷണറുടെ മൂന്നാം ഭാഗം തിരക്കഥയെഴുതി സംവിധാനം ചെയ്യുന്നത് സംവിധായകന്‍ ഷാജി കൈലാസ് ആണ്. മൂന്നാം ഭാഗത്തിലും സുരേഷ് ഗോപി തന്നെയാണ് കമ്മീഷണര്‍ ഭരത് ചന്ദ്രനായി പ്രേക്ഷകര്‍ക്ക് മുന്നില്‍ എത്തുക. മലയാളത്തിലും തമിഴിലും തെലുങ്കിലുമായി നാല്പതോളം ചിത്രങ്ങള്‍ അതും അധികവും ആക്ഷന്‍ ചിത്രങ്ങള്‍ സംവിധാനം ചെയ്തിട്ടുള്ള ഷാജി കൈലാസ് അദ്യമായാണ് സ്വന്തം ചിത്രത്തിന് തിരക്കഥ ഒരുക്കുന്നത്.
ചെന്നൈ : പ്രശസ്ത ചലച്ചിത്ര പിന്നണി ഗായിക സുജാതയുടെ മകളും പിന്നണി ഗായികയുമായ ശ്വേത മോഹന്റെ വിവാഹ നിശ്ചയം കഴിഞ്ഞു. ഏറെ കാലം പ്രണയത്തിലായിരുന്ന അശ്വിനുമായുള്ള ശ്വേതയുടെ വിവാഹ നിശ്ചയം ചെന്നൈയില്‍ വെച്ചാണ് നടന്നത്. വിജയ്‌ യേശുദാസ്‌, ശ്രീനിവാസന്‍, പ്രിയദര്‍ശന്‍, ലിസ്സി എന്നിങ്ങനെ സിനിമാ രംഗത്തെ ഒട്ടേറെ പ്രമുഖര്‍ ചടങ്ങില്‍ പങ്കെടുത്തു.
ചങ്ങരംകുളം : കാണി വാര്ഷിക പരിപാടികളുടെ ഭാഗമായി ജോണ്‍ അബ്രഹാം അനുസ്മരണം സംഘടിപ്പിക്കുന്നു. മെയ്‌ 30ന് കാലത്ത് 10 മണിക്ക് ചങ്ങരംകുളം കൃഷ്ണ മൂവീസില്‍ വാര്ഷിക പരിപാടികള്‍ ആരംഭിക്കും. വൈകുന്നേരം 3 മണിക്ക് ചങ്ങരംകുളം റഗുലേറ്റഡ് മാര്‍ക്കറ്റില്‍ വച്ച് നടക്കുന്ന ചടങ്ങില്‍ കെ. പി. രാമനുണ്ണി കാണി വാര്ഷിക പ്പതിപ്പിന്റെ പ്രകാശനം നിര്‍വ്വഹിക്കും. ആലങ്കോട് ലീലാകൃഷ്ണന്‍ അധ്യക്ഷനായിരിക്കും. തുടര്‍ന്ന് സൂഫി പറഞ്ഞ കഥ എന്ന സിനിമയെ കുറിച്ചുള്ള : സംവാദം നടക്കും. അവതരണം: കെ. എ. മോഹന്‍ ദാസ്, പങ്കെടുക്കുന്നവര്‍ : കെ. പി. രാമനുണ്ണി, പ്രകാശ് ബാരെ, തമ്പി ആന്റണി, റഫീക് അഹമ്മദ്‌, കുമാര്‍ എടപ്പാള്‍ എന്നിവര്‍.
നടി ശ്വേതാ മേനോനു ഷൂട്ടിങ്ങിനിടെ പരിക്കേറ്റു. വി. എം. വിനു സംവിധാനം ചെയ്യുന്ന “പെണ്‍ പട്ടണം” എന്ന ചിത്രത്തില്‍ സംഘട്ടന രംഗം ചിത്രീകരി ക്കുന്നതിനിടയിലാണ് കൊടുവാള്‍ കൊണ്ട് വെട്ടേറ്റത്. പരിക്കേറ്റ നടിയെ ഉടന്‍ ആശുപത്രിയില്‍ പ്രവേശിപ്പിച്ചു. ശസ്ത്രക്രിയയ്ക്ക് വിധേയയായ നടിക്ക് ഡോക്ടര്‍മാര്‍ വിശ്രമം നിര്‍ദ്ദേശി ച്ചിരിക്കയാണ്.
പ്രശസ്ത തെന്നിന്ത്യന്‍ ചലച്ചിത്ര താരം ഖുശ്ബു ഡി. എം. കെ. യില്‍ ചേര്‍ന്നു. കരുണാനിധി യുള്‍പ്പെടെ പ്രമുഖ നേതാക്കള്‍ പങ്കെടുത്ത ചടങ്ങില്‍ വച്ചാണ് പ്രഖ്യാപനം ഉണ്ടായത്. അടുത്ത കാലത്തായി ഖുശ്ബുവിന്റെ രാഷ്ടീയ പ്രവേശം സംബന്ധിച്ച് വാര്‍ത്തകള്‍ സജീവമായിരുന്നു. താനും കുടുംബവും ഇന്ദിരാ ഗാന്ധിയുടേയും രാജീവ് ഗാന്ധിയുടേയും ഇപ്പോള്‍ സോണിയാ ഗാന്ധിയുടേയും ആരാധകര്‍ ആണെന്നു ഖുശ്ബു പറഞ്ഞതിനെ തുടര്‍ന്ന് ഇവര്‍ കോണ്‍ഗ്രസ്സില്‍ ചേരും എന്നായിരുന്നു അഭ്യൂഹങ്ങള്‍ നില നിന്നിരുന്നത്.
