അബുദാബി: മലയാളം മിഷൻ അബുദാബി ചാപ്റ്റർ സംഘടിപ്പിക്കുന്ന അദ്ധ്യാപക പരിശീലനവും പ്രവേശനോത്സവും മെയ് 20, 21 ശനി ഞായര്‍ ദിവസങ്ങളില്‍ കേരളാ സോഷ്യല്‍ സെന്‍ററില്‍ വെച്ച് നടക്കും.
കണിക്കൊന്ന, സൂര്യകാന്തി, ആമ്പൽ വിഭാഗങ്ങളിലെ അദ്ധ്യാപക പരിശീലനം മെയ് 20 ശനിയാഴ്ച രാവിലെ 10 മണി മുതൽ ഉച്ചക്ക് 2 വരെയും, മെയ് 21, ഞായറാഴ്ച രാവിലെ 10 മണി മുതൽ വൈകുന്നേരം 5 വരെയും നടക്കും.
അബുദാബി ചാപ്റ്ററിനു കീഴിലെ വിവിധ മേഖല കളിൽ പുതുതായി പേര് രജിസ്റ്റർ ചെയ്തിരിക്കുന്ന വിദ്യാർത്ഥികൾക്കായി ആരംഭിക്കുന്ന പഠന കേന്ദ്ര ങ്ങളിലേക്കുള്ള പ്രവേശനോത്സവം മെയ് 22 തിങ്കളാഴ്ച രാത്രി 7 മണിക്ക് കെ. എസ്. സി. യിൽ വെച്ച് പ്രശസ്ത കവിയും മലയാളം മിഷൻ രജിസ്ട്രാറുമായ വിനോദ് വൈശാഖി ഉദ്ഘാടനം ചെയ്യും. സാമൂഹ്യ സാംസ്കാരിക രംഗത്തെ പ്രമുഖര്‍ സംബന്ധിക്കും.
മലയാളം മിഷൻ സീനിയർ വിദ്യാർത്ഥികൾ അവതരിപ്പിക്കുന്ന കലാ പരിപാടികൾ അരങ്ങേറും.
അബുദാബി ചാപ്റ്ററിനു കീഴിൽ പ്രവർത്തിച്ചു കൊണ്ടിരിക്കുന്ന കേരള സോഷ്യൽ സെന്റർ, അബുദാബി മലയാളി സമാജം, അബുദാബി സിറ്റി, ഷാബിയ, ബദാ സായിദ്, അൽ ദഫ്‌റ എന്നീ മേഖല കളിലെ പഠന കേന്ദ്രങ്ങൾ സംയുക്തമായാണ് പരിപാടികൾ സംഘടിപ്പിക്കുന്നത്.
