അബുദാബി : മാര്‍തോമാ സഭയുടെ അഭിവന്ദ്യ തിരുമേനി ഫിലിപ്പോസ് മാര്‍ ക്രിസോസ്റ്റം വലിയ മെത്രാപ്പൊലീത്തയ്ക്ക് മാര്‍ച്ച് 15 വ്യാഴാഴ്ച വൈകീട്ട് 7.30 ന് അബുദാബി മലയാളി സമാജം അങ്കണത്തില്‍ സ്വീകരണം നല്‍കുന്നു.
തൊണ്ണൂറ്റി അഞ്ചാം പിറന്നാള്‍ ആഘോഷിക്കുന്ന തിരുമേനിയും ഗുരുവായൂര്‍ ആസ്ഥാനമായി പ്രവര്‍ത്തിക്കുന്ന ഉമാ പ്രേമന്റെ ശാന്തി മെഡിക്കല്‍ ഇന്‍ഫര്‍മേഷന്‍ സെന്ററും സംയുക്ത മായി നടപ്പാക്കാന്‍ പോകുന്ന വൃക്ക രോഗികള്‍ ക്കായുള്ള സഹായ പദ്ധതിയായ ‘കനിവ് 95’ ന്റെ ഗ്ലോബല്‍ ലോഞ്ചിംഗ് ചടങ്ങ് തിരുമേനി നിര്‍വഹിക്കും.
ശാന്തി മെഡിക്കല്‍ ഇന്‍ഫര്‍മേഷന്‍ സെന്റര്‍ മേധാവി ഉമാ പ്രേമനും അബുദാബി യിലെ സാംസ്‌കാരിക വ്യാവസായിക പ്രമുഖരും ചടങ്ങില്‍ പങ്കെടുക്കും. ഈ സംരംഭ ത്തിലേക്കുള്ള ആദ്യ സംഭാവന അബുദാബി മലയാളി സമാജം നല്‍കും. തിരുമേനി യുടെ 95 വര്‍ഷത്തെ ജീവിതം വെളിപ്പെടുത്തുന്ന ‘പിന്നിട്ട 95 വര്‍ഷങ്ങള്‍ ‘ എന്ന പേരിലുള്ള വിപലുമായ ഫോട്ടോ പ്രദര്‍ശനവും സമാജം സംഘടിപ്പിച്ചിട്ടുണ്ട്.
