അബുദാബി : അന്തരിച്ച ശൈഖ് തഹ്നൂൻ ബിൻ മുഹമ്മദ് അല്‍ നഹ്യാന്റെ സ്മരണാർത്ഥം അൽ-ഐൻ എയർ പോർട്ടിന് അദ്ദേഹത്തിന്റെ പേര് നൽകി യു. എ. ഇ. പ്രസിഡണ്ട് ശൈഖ് മുഹമ്മദ് ബിൻ സായിദ് അൽ നഹ്യാൻ. ഇനി മുതല്‍ ‘തഹ്നൂൻ ഇന്റർ നാഷണൽ എയർ പോർട്ട്’ എന്ന പേരിൽ ആയിരിക്കും അൽ-ഐൻ എയർ പോർട്ട് അറിയപ്പെടുക.
ദശാബ്ദങ്ങളോളം അദ്ദേഹം രാജ്യത്തിന് നല്‍കിയ സേവനങ്ങൾക്കുള്ള ആദരവ് ആയിട്ടാണ് ശൈഖ് തഹ്നൂൻ ബിൻ മുഹമ്മദ് അല്‍ നഹ്യാന്റെ പേര് വിമാനത്താവളത്തിന് നല്‍കിയത്. യു. എ. ഇ. രൂപീകരിച്ച വേളയിൽ രാജ്യത്തിന്റെ പ്രധാന മുഖങ്ങളില്‍ ഒന്നായിരുന്നു.
രാഷ്ട്ര പിതാവ് ശൈഖ് സായിദ് ബിൻ സുൽത്താൻ അൽ നഹ്യാന്റെ ഉപദേശകനും രാജ്യത്തിന്റെ വികസനത്തില്‍ മുഖ്യ പങ്ക് വഹിച്ച വ്യക്തിത്വം കൂടിയാണ് ശൈഖ് തഹ്നൂൻ. കിഴക്കൻ മേഖലയിൽ അബുദാബി ഭരണാധികാരിയുടെ പ്രതിനിധിയായി 1971 മുതൽ പ്രവർത്തിച്ചു. അഞ്ച് ദശാബ്ദത്തില്‍ അധികം ഈ പദവി അദ്ദേഹം അലങ്കരിച്ചു. സര്‍ക്കാര്‍ സംവിധാനങ്ങൾ അൽ ഐനിൽ ഒരുക്കുന്നതില്‍ മുൻ നിരയിൽ ഉണ്ടായിരുന്നു.
അല്‍ ഐന്‍ മുന്‍സിപ്പാലിറ്റി ചെയര്‍മാൻ, അബുദാബി എക്‌സിക്യൂട്ടീവ് കൗണ്‍സില്‍ വൈസ് ചെയര്‍മാന്‍, അഡ്‌നോക്ക് ചെയര്‍മാന്‍, സുപ്രീം പെട്രോളിയം കൗണ്‍സില്‍ വൈസ് ചെയര്‍മാന്‍ എന്നീ പദവികൾ വഹിച്ചിരുന്നു.
2024 മെയ് ഒന്നിനാണ് ശൈഖ് തഹ്നൂൻ ബിൻ മുഹമ്മദ് അല്‍ നഹ്യാൻ വിട വാങ്ങിയത്. വിമാനത്താവളത്തിന് അദ്ദേഹത്തിന്റെ പേര് നല്‍കിയതിലൂടെ ശൈഖ് തഹ്നൂൻ എന്നും ഓർമ്മിക്കപ്പെടും. W A M, AD MEDIA
