അഴിമതിക്കെതിരെ ജനങ്ങളുടെ പാർട്ടി : കെജ്രിവാൾ

October 3rd, 2012

arvind-kejriwal-epathram

ന്യൂഡൽഹി : അഴിമതിയിൽ മുങ്ങിക്കുളിച്ച സർക്കാരിനെ മടുത്ത ജനം രാജ്യത്തെ രാഷ്ട്രീയ രംഗം ഉടച്ചു വാർക്കാൻ തീരുമാനം എടുത്തതായി തന്റെ പുതിയ രാഷ്ട്രീയ പാർട്ടിയുടെ പ്രാരംഭ പ്രഖ്യാപനമായി സാമൂഹ്യ പ്രവർത്തകൻ അരവിന്ദ് കെജ്രിവാൾ അറിയിച്ചു. സാധാരണക്കാരന് ഇതൊരു സുപ്രധാന ദിനമാണ്. ദുസ്സഹമായ വിലക്കയറ്റത്തിന് എതിരെയും അനുദിനം പെരുകുന്ന അഴിമതിക്കെതിരെയും ഉള്ള ജനകീയ മുന്നേറ്റമാണിത് എന്ന് “ഞാൻ ഒരു സാധാരണക്കാരൻ – എനിക്ക് ജന ലോൿപാൽ വേണം” എന്ന് മുദ്രണം ചെയ്ത ഗാന്ധിത്തൊപ്പി അണിഞ്ഞ കെജ്രിവാൾ പ്രഖ്യാപിച്ചു.

അഭിപ്രായ ഭിന്നതകൾ കാരണം അന്നാ ഹസാരെയുമായി വഴി പിരിഞ്ഞ അദ്ദേഹം താനും അന്നാ ഹസാരെയുമായി വഴക്കൊന്നുമില്ല എന്ന് വ്യക്തമാക്കി. പുതിയ പാർട്ടിയുടെ പേര് പിന്നീട് പ്രഖ്യാപിക്കും. അടുത്ത തെരഞ്ഞെടുപ്പിൽ ഡൽഹിയിൽ മൽസരിക്കും. പുതിയ പാർട്ടി ജനങ്ങളുടെ പാർട്ടിയാണ്. ജനങ്ങൾ നൽകുന്ന പണം കൊണ്ടായിരിക്കും പാർട്ടിയുടെ പ്രവർത്തനം. ജനങ്ങൾ തന്നെ പ്രചാരണം നടത്തും. ജനങ്ങൾ തന്നെ തെരഞ്ഞെടുപ്പിൽ മൽസരിക്കും. തങ്ങൾ നല്ല സ്ഥാനാർത്ഥികളെ തെരഞ്ഞെടുപ്പിൽ നിർത്തിയാൽ അന്നാ ഹസാരെയുടെ പിന്തുണ തങ്ങൾക്ക് ലഭിക്കും എന്നും കെജ്രിവാൾ പ്രത്യാശ പ്രകടിപ്പിച്ചു.

- ജെ.എസ്.

വായിക്കുക: , , ,

Comments Off on അഴിമതിക്കെതിരെ ജനങ്ങളുടെ പാർട്ടി : കെജ്രിവാൾ

ബംഗ്ലാദേശില്‍ ബുദ്ധമത ക്ഷേത്രങ്ങള്‍ തീയ്യിട്ട് നശിപ്പിച്ചു

October 1st, 2012

budhist-temple-destroyed-epathram

ധാക്ക: ബംഗ്ലാദേശിലെ കോക്സ് ബസാറില്‍ ഒരു സംഘം കലാപകാരികള്‍ പത്തോളം ബുദ്ധമത ക്ഷേത്രങ്ങള്‍ തീയ്യിട്ട് നശിപ്പിച്ചു. കൂടാതെ നിരവധി ബുദ്ധമത വിശ്വാസികളുടെ വീടുകള്‍ തകര്‍ക്കുകയും കൊള്ളയടിക്കുകയും ചെയ്തു. ഫേസ്ബുക്കില്‍ ഇസ്ലാമിനെ നിന്ദിക്കുന്ന രീതിയില്‍ ഉള്ള ചിത്രം പ്രസിദ്ധീകരിക്ക പ്പെട്ടിരുന്നു. ഇത് ബുദ്ധമത വിശ്വാസിയായ ഒരാള്‍ ചെയ്തതാണെന്ന് ആരോപിച്ചായിരുന്നു ബുദ്ധ ക്ഷേത്രങ്ങള്‍ക്കും ബുദ്ധ മതക്കാരുടെ വീടുകള്‍ക്കും നേരെ അക്രമണം നടത്തിയത്. പ്രതിഷേധക്കാരുടെ ആക്രമണത്തില്‍ നിരവധി ബുദ്ധ മത വിശ്വാസികള്‍ക്ക്  പരിക്കേറ്റിട്ടുണ്ട്. അക്രമികളെ ഭയന്ന് തീരദേശ ജില്ലയിലെ കോക്സ് ബസാറിലെ ന്യൂനപക്ഷ വിഭാഗമായ ബുദ്ധ മതക്കാര്‍ ഭീതിയോടെ ആണ് കഴിയുന്നത്. പ്രദേശത്തെ ബുദ്ധ മത വിശ്വാസികള്‍ക്ക് സംരക്ഷണം നല്‍കുവാന്‍ രാജ്യത്തെ പ്രമുഖ ബുദ്ധ മത ആചാര്യന്മാര്‍ ആവശ്യപ്പെട്ടിട്ടുണ്ട്.

- എസ്. കുമാര്‍

വായിക്കുക: , , ,

Comments Off on ബംഗ്ലാദേശില്‍ ബുദ്ധമത ക്ഷേത്രങ്ങള്‍ തീയ്യിട്ട് നശിപ്പിച്ചു

കൂടംകുളം : സുരക്ഷാ മാനദണ്ഡങ്ങള്‍ പാലിക്കണമെന്നു സുപ്രീംകോടതി

September 28th, 2012

supremecourt-epathram

ന്യൂഡല്‍ഹി : കൂടംകുളം ആണവ നിലയത്തിന്റെ സുരക്ഷാ കാര്യങ്ങളില്‍ യാതൊരു വിട്ടുവീഴ്ചയും പാടില്ലെന്നും അക്കാര്യം ഉറപ്പാക്കാതെ നിലയം പ്രവർത്തിക്കാൻ ആവില്ല എന്നും സുപ്രീം കോടതി വ്യക്തമാക്കി. ആണവ നിലയത്തിന്റെ സുരക്ഷ ഉറപ്പാക്കിയില്ലെങ്കില്‍ നിലയത്തിന്റെ കമ്മിഷനിംഗ്‌ നിരോധിക്കേണ്ടി വരുമെന്നും കോടതി പറഞ്ഞു. പണം ചിലവാക്കി എന്നത് ഒരു ന്യായീകരണം അല്ലെന്നും, ജനങ്ങള്‍ക്ക്‌ ദോഷകരമായി ബാധിക്കുമെങ്കിൽ നിർമ്മാണ പ്രവർത്തനങ്ങൾ അവസാനിപ്പിക്കുകയല്ലാതെ വഴിയില്ലെന്നും കോടതി നിരീക്ഷിച്ചു.

1989ല്‍ അംഗീകരിച്ച പാരിസ്ഥിതിക മാനദണ്ഡ പ്രകാരമാണ്‌ കൂടംകുളം ആണവ നിലയം നിര്‍മിച്ചത്‌. എന്നാല്‍ ഇന്ന് അക്കാര്യങ്ങള്‍ നിലനില്‍ക്കുന്നതാണോ എന്ന് നോക്കണമെന്ന് കോടതി പറഞ്ഞു. ജപ്പാനിലെ ഫുകുഷിമ ആണവ നിലയത്തില്‍ കഴിഞ്ഞ വര്‍ഷം ഉണ്ടായ ദുരന്തത്തിന്റെ പശ്‌ചാത്തലത്തില്‍ അപകട സാധ്യതയെ പറ്റി കാര്യക്ഷമമായ പഠനം നടത്തണമെന്നും, കൂടംകുളം നിലയത്തിനെതിരേ തദ്ദേശവാസികളുടെ ആശങ്ക അകറ്റാന്‍ തയ്യാറാകണം എന്നും കോടതി പറഞ്ഞു.

എന്നാല്‍ എ. ഇ. ആര്‍. ബി. നിര്‍ദേശിച്ച 17 ശുപാര്‍ശകള്‍ നടപ്പാക്കിയില്ലെങ്കില്‍ പോലും കൂടംകുളം നിലയം സുരക്ഷിതമാണെന്നാണ്‌ ന്യൂക്ലിയര്‍ പവര്‍ കോര്‍പറേഷന്‍ ഓഫ്‌ ഇന്ത്യ സുപ്രീം കോടതിയില്‍ അഭിപ്രായപ്പെട്ടത്‌. ഇതേ നിലപാടാണ് കേന്ദ്ര സര്‍ക്കാരിനും തമിഴ്നാട്‌ സര്‍ക്കാരിനും. എന്നാല്‍ കോടതി ഉത്തരവ് സമര സമിതിയെ ആവേശം കൊള്ളിച്ചു. ഈ ഉത്തരവിനെ സ്വാഗതം ചെയ്യുന്നു എന്നാണു സമര നേതാവ് എസ്. പി. ഉദയകുമാര്‍ പറഞ്ഞത്.

- ഫൈസല്‍ ബാവ

വായിക്കുക: , , , , ,

Comments Off on കൂടംകുളം : സുരക്ഷാ മാനദണ്ഡങ്ങള്‍ പാലിക്കണമെന്നു സുപ്രീംകോടതി

ആണവായുധം കാട്ടി വിരട്ടണ്ട : നെജാദ്

September 28th, 2012

mahmoud-ahmadinejad-epathram

ഐക്യരാഷ്ട്ര സഭ : അമേരിക്കയുടെയും ഇസ്രായേലിന്‍െറയും പാശ്ചാത്യ രാഷ്ട്രങ്ങളുടെയും വിരട്ടല്‍ വിലപ്പോവില്ലെന്നും, ഊര്‍ജ്ജാവശ്യത്തിനുള്ള ആണവോര്‍ജ നിര്‍മ്മാണത്തില്‍ നിന്നും പിന്നോട്ടില്ലെന്നും ഇറാന്‍ പ്രസിഡന്‍റ് മഹ്മൂദ് അഹ്മദി നെജാദ് യു. എൻ. പൊതുസഭയില്‍ പറഞ്ഞു. സമാധാനപരമായ ആവശ്യങ്ങൾക്ക് മാത്രമേ ആണവ ഊര്‍ജ്ജത്തെ ഉപയോഗിക്കാന്‍ ഇറാന്‍ തയ്യാറാകൂ. അതിനെ എതിര്‍ക്കുന്ന ഇരട്ടത്താപ്പ് നയം സ്വീകരിക്കുന്ന അമേരിക്കന്‍ നടപടിയെ നെജാദ് രൂക്ഷമായി വിമര്‍ശിച്ചു. തന്‍െറ എട്ടാമത്തെയും അവസാനത്തെയും പ്രസംഗത്തിലാണ് നെജാദിന്റെ ഈ പരാമര്‍ശം. സമാധാനപരമായ ലോകം നിലനില്‍ക്കാന്‍ ഇറാന്‍ ആഗ്രഹിക്കുന്നു. അതിനാല്‍ ഈ വിഷയത്തില്‍ അമേരിക്കയുമായി ക്രിയാത്മകമായ ചര്‍ച്ചയ്ക്ക് ഒരുക്കമാണെന്നും അമേരിക്കയുടെ ഉപരോധം ഇറാന്‍ ജനതയോടുള്ള പ്രതികാരമാണെന്നും നെജാദ് പറഞ്ഞു.

- ഫൈസല്‍ ബാവ

വായിക്കുക: , ,

Comments Off on ആണവായുധം കാട്ടി വിരട്ടണ്ട : നെജാദ്

പ്രവാചക നിന്ദ : മസ്ക്കറ്റിൽ വീണ്ടും പ്രതിഷേധം

September 16th, 2012

oman-protest-epathram

മസ്കറ്റ് : പ്രവാചകന്‍ മുഹമ്മദ് നബിയെയും ഇസ്ലാം മത വിശ്വാസികളെയും അവഹേളിക്കുന്ന ചലച്ചിത്രം പുറത്തിറക്കിയതില്‍ പ്രതിഷേധിച്ച് വെള്ളിയാഴ്ചയും ഒരു സംഘം ഒമാനി യുവാക്കള്‍ മസ്കത്തിലെ യു. എസ്. എംബസിയിലേക്ക് പ്രകടനം നടത്തി. ശാത്തി ഖുറം മസ്ജിദില്‍ നിന്ന് ജുമുഅ നമസ്കാരം കഴിഞ്ഞ് സംഘടിച്ച മുപ്പതോളം യുവാക്കള്‍ അമേരിക്കന്‍ വിരുദ്ധ മുദ്രാവാക്യം മുഴക്കി യു. എസ്. എംബസി പ്രവര്‍ത്തിക്കുന്ന ജംഇയ്യത്തുല്‍ ദവ്വല്‍ അല്‍ അറേബ്യ സ്ട്രീറ്റിലേക്ക് നീങ്ങുകയായിരുന്നു.

നേരത്ത കനത്ത പൊലീസ് ബന്തവസ്സിലായിരുന്ന എംബസിയുടെ പരിസരത്തേക്ക് ഇതോടെ കൂടുതല്‍ പൊലീസും സൈന്യവും ഇരച്ചെത്തി. യു. എസ്. എംബസിയിലേക്ക് എത്തുന്നതിന് മുമ്പുള്ള ബ്രിട്ടിഷ് എംബസിയുടെ സമീപം പ്രകടനക്കാരെ പൊലീസും സൈന്യവും തടഞ്ഞു. കുപ്രചരണങ്ങള്‍ അവസാനിപ്പിച്ച് പ്രവാചകനെയും ഇസ്ലാമിനെയും തിരിച്ചറിയാന്‍ ശ്രമിക്കണമെന്നും, ലോകമെമ്പാടും അരക്ഷിതാവസ്ഥ സൃഷ്ടിക്കാനുള്ള യു. എസ് – ജൂത
ഗൂഢാലോചനകളെ തിരിച്ചറിയണമെന്നും പ്രകടനക്കാര്‍ മുദ്രാവാക്യം മുഴക്കി കൊണ്ടിരുന്നു. പിന്നീട് സൈന്യത്തിന്‍െറയും പൊലീസിന്‍െറയും നിര്‍ദേശം പാലിച്ച് യുവാക്കള്‍ ശാന്തരായി പിരിഞ്ഞു പോയി. എംബസി പരിസരത്ത് പ്രതിഷേധ പ്രകടനം നടന്നുവെന്ന് വെള്ളിയാഴ്ച യു. എസ്. എംബസിയും ഔദ്യാഗികമായി സ്ഥിരീകരിച്ചു.

അടുത്ത ദിവസങ്ങളില്‍ പ്രതിഷേധം കുടുതല്‍ ശക്തമാകാന്‍ സാധ്യതയുള്ളതിനാല്‍ ജീവനക്കാര്‍ എംബസി പരിസരത്ത് നിന്ന് മാറി നില്‍ക്കണമെന്ന് നയതന്ത്ര കാര്യാലയം വെബ്സൈറ്റിലൂടെ നിര്‍ദേശം നല്‍കി. യമൻ‍, ലിബിയ, ഈജിപ്ത് എന്നിവിടങ്ങളിലെ എംബസികള്‍ക്ക് നേരെ കനത്ത ആക്രമണമുണ്ടായ സാഹചര്യത്തില്‍ മസ്കത്ത് നഗരത്തിലെയും ഒമാനിലെയും സ്ഥിതിഗതികള്‍ എംബസി നിരീക്ഷിച്ചു വരികയാണ്. ഈ സാഹചര്യത്തില്‍ പ്രകടനം നടക്കുന്ന മേഖലകളില്‍ നിന്ന് യു. എസ്. പൗരന്‍മാര്‍ വിട്ടു നില്‍ക്കണം. എംബസി പരിസരത്തേക്ക് വരുന്നതും പരമാവധി ഒഴിവാക്കുക. പ്രകടനങ്ങള്‍ ആരംഭിക്കുന്നത് സമാധാന പരമായാണെങ്കിലും ഏതു നിമിഷവും അക്രമാസക്തമായേക്കാം. അതിനാല്‍, പ്രാദേശിക മാധ്യമങ്ങളില്‍ നിന്നും മറ്റും രാജ്യത്തെ ക്രമസമാധാനം സംബന്ധിച്ച വിവരങ്ങള്‍ നിരീക്ഷിച്ചു കൊണ്ടിരിക്കണം.

ഒമാനിലുള്ള അമേരിക്കന്‍ പൗരന്‍മാര്‍ അവരുടെ യാത്രാ രേഖകള്‍ ഏതു സമയവും യാത്ര ചെയ്യാന്‍ കഴിയുന്ന വിധം കാലാവധി യുള്ളവയാണെന്ന് ഉറപ്പു വരുത്തണം. സ്റ്റേറ്റ് ഡിപ്പാര്‍ട്ടുമെന്‍റിന്‍െറ സ്മാര്‍ട്ട് ട്രാവലര്‍ എന്‍റോള്‍മെന്‍റ് പ്രോഗ്രാമില്‍ പൗരന്‍മാര്‍ ഉടന്‍ പേര് രജിസ്റ്റര്‍ ചെയ്യണമെന്നും യാത്രകള്‍
സുഗമമാക്കാന്‍ ഇത് സഹായിക്കുമെന്നും എംബസി പുറപ്പെടുവിച്ച ജാഗ്രതാ നിര്‍ദേശത്തില്‍ പറയുന്നു.

(അയച്ചു തന്നത് : ബിജു കരുനാഗപ്പള്ളി)

- കറസ്പോണ്ടന്‍റ്

വായിക്കുക: , ,

Comments Off on പ്രവാചക നിന്ദ : മസ്ക്കറ്റിൽ വീണ്ടും പ്രതിഷേധം

Page 30 of 33« First...1020...2829303132...Last »

« Previous Page« Previous « വിദേശ നിക്ഷേപം സംസ്ഥാനങ്ങൾ തള്ളി
Next »Next Page » തൊഴിൽ പീഢനം : എഞ്ജിനിയർമാർക്ക് മോചനം »



ക്രിക്കറ്റ് സ്‌റ്റേഡിയം ക...
ലിയോ ടോള്‍സ്റ്റോയി ലോക സാ...
മൈക്കള്‍ ജാക്സന്‍റെ മരണത്...
ഫേസ്ബുക്ക് കമന്റ് കാരണം സ...

Click here to download Malayalam fonts
Click here to download Malayalam fonts
Your Ad Here
Club Penguin


ePathram Magazine
ePathram Pacha