ദുബായ് : ഡ്രൈവർമാർക്ക് വീണ്ടും ദുബായ് പോലീസിൻറെ മുന്നറിയിപ്പ്. അശ്രദ്ധമായും അപകടകരമായും ഉള്ള ഡ്രൈവിംഗ്, തിരക്കേറിയ റോഡിൽ വേഗതയിൽ ഓടിക്കൊണ്ടിരിക്കെ പെട്ടെന്ന് വാഹനം വെട്ടിച്ചു മാറ്റൽ, വാഹനങ്ങൾ തമ്മിൽ നിശ്ചിത അകലം പാലിക്കാതിരിക്കൽ, റോഡ് ഷോൾഡറിലൂടെ അശ്രദ്ധമായി വാഹനം ഓടിക്കുക-ഓവർ ടേക്കു ചെയ്യുക എന്നിവ നിയമ വിരുദ്ധമാണ്. ഇത് റോഡിലുള്ള മറ്റു യാത്രക്കാരെയും അപകടത്തിൽ പെടുത്തും.
ഇത്തരത്തിൽ അശ്രദ്ധമായും അപകടകരമായും വാഹനം ഓടിച്ചതിന് 2023 ലെ ഡിക്രി നമ്പർ (30) പ്രകാരം ഒരു ഡ്രൈവർക്ക് എതിരെ നിയമ സടപടി സ്വീകരിച്ച് വാഹനം കണ്ടു കെട്ടി. മാത്രമല്ല വാഹനം വിടുതൽ ചെയ്യാൻ 50,000 ദിർഹം പിഴയും ചുമത്തി എന്ന് ദുബായ് പോലീസ് സാമൂഹിക മാധ്യമ ങ്ങളിൽ പങ്കു വെച്ച വീഡിയോയിൽ പറയുന്നു.
ആംബുലൻസുകൾ, സിവിൽ ഡിഫൻസ്-പോലീസ്, മറ്റു അടിയന്തര വാഹനങ്ങൾ എന്നിവക്ക് മാത്രം പോകാൻ അനുമതിയുള്ള റോഡ് ഷോൾഡറിലൂടെയുള്ള ഓവർ ടേക്കിംഗ് വലിയ നിയമ ലംഘനമാണ് എന്നും പോലീസ് ഓർമ്മിപ്പിക്കുന്നു.
