ദുബായ് : കഴിഞ്ഞ ദിവസങ്ങളിലെ മഴയിൽ റോഡിൽ അപകടകരമാം വിധം വാഹനങ്ങൾ കൊണ്ട് അഭ്യാസ പ്രകടനങ്ങൾ നടത്തിയവരെ ദുബായ് പോലീസ് പിടികൂടി. മഴയെ അവഗണിച്ചു കൊണ്ട് ദുബായിലെ വിവിധ പ്രദേശങ്ങളിൽ നടന്ന വാഹന അഭ്യാസ ങ്ങളുടെ വീഡിയോ സാമൂഹിക മാധ്യമങ്ങളിൽ വൈറലായിരുന്നു. പോലീസ് പരിശോധനയിൽ വാഹനങ്ങൾ കണ്ടു കെട്ടി.

മഴ പെയ്യുമ്പോൾ റോഡുകളിൽ ടയറുകളുടെ ഗ്രിപ്പ് കുറയുന്നതിനാൽ ഇത്തരം അഭ്യാസങ്ങൾ വലിയ അപകടങ്ങൾക്കും ജീവഹാനിക്കും കാരണമാവും. അശ്രദ്ധമായ ഡ്രൈവിംഗ്, അഭ്യാസ പ്രകടനങ്ങൾ, വലിയ ശബ്ദ കോലാഹലങ്ങൾ ഉണ്ടാക്കി പൊതു ജനങ്ങൾക്ക് ശല്യം ഉണ്ടാക്കൽ തുടങ്ങിയ നിയമ ലംഘനങ്ങൾക്കാണ് വാഹനങ്ങൾ പിടിച്ചെടുത്തത്.

2023-ലെ 30-ാം നമ്പർ നിയമ പ്രകാരം, പിടിച്ചെടുത്ത വാഹനങ്ങൾ വിട്ടു കിട്ടുന്നതിനു നിയമ ലംഘകർക്ക് 50,000 ദിർഹം പിഴ ശിക്ഷ നൽകി. സുരക്ഷിതമായ ഡ്രൈവിംഗ് അത് നിങ്ങളുടെയും മറ്റുള്ളവരുടെയും ജീവൻറെ വിലയാണ് എന്നും ദുബായ് പോലീസ് ഓർമിപ്പിച്ചു. Image Credit : DUBAI POLICE

ദുബായ് : പൊതു ജനങ്ങളുടെ സുരക്ഷയ്ക്കും ജീവനും ഭീഷണിയാവുന്ന തരത്തിൽ അപകടകരമായ രീതി യിൽ അശ്രദ്ധമായി വാഹനം ഓടിക്കുന്നവർക്ക് കർശ്ശന മുന്നറിയിപ്പുമായി ദുബായ് പോലീസ്.

ട്രാഫിക് നിയമങ്ങൾക്ക് വില കൽപ്പിക്കാതെ അമിത വേഗത്തിലും സിഗ്നലുകൾ പ്രദർശിപ്പിക്കാതെ ട്രാക്ക് മാറ്റിയും അഭ്യാസം കാണിക്കുന്ന ഡ്രൈവർമാർക്ക് എതിരെ വിട്ടു വീഴ്ചയില്ലാത്ത നിയമ നടപടികൾ സ്വീകരിക്കും.

പൊതു ജനങ്ങൾ ഈയിടെ പൊലീസിന് അയച്ചു കൊടുത്ത ഏതാനും വീഡിയോകൾ തങ്ങളുടെ സോഷ്യൽ മീഡിയ പേജുകളിൽ പങ്കു വെച്ചു കൊണ്ടാണ് ദുബായ് പോലീസിന്റെ മുന്നറിയിപ്പ്.

അപകടകരമായ ഡ്രൈവിംഗ് ജീവഹാനിക്കു വരെ കാരണം ആയേക്കാം. ഇത്തരം പ്രവൃത്തികൾ ശ്രദ്ധയിൽ പ്പെട്ടാൽ ദുബായ് പോലീസിൻറെ മൊബൈൽ അപ്ലിക്കേഷൻ Police EYE smart App വഴി റിപ്പോർട്ട് ചെയ്യാം എന്നും അധികൃതർ അറിയിച്ചു.

Image Credit : Dubai Police FaceBook