തിരുവനന്തപുരം : ശമ്പള വര്‍ദ്ധനയുമായി ബന്ധപ്പെട്ട് ഇന്ത്യന്‍ നഴ്സസ് അസോസിയേഷന്‍ നടത്തുന്ന നിരാഹര സമരം ചര്‍ച്ച ചെയ്യാന്‍ ഇന്നു തൊഴില്‍ മന്ത്രിയുടെ അദ്ധ്യക്ഷതയില്‍ വീണ്ടും യോഗം വിളിച്ചു ചേര്‍ത്തു. സമരത്തിന്റെ ഏഴാം ദിവസത്തിലാണ് കാര്യങ്ങള്‍ ചര്‍ച്ച ചെയ്യാന്‍ മന്ത്രി യോഗം വിളിച്ചത്. തിരുവനന്തപുരത്തും കണ്ണൂരും സമരം തുടരുന്ന നഴ്സുമാരെയാണ് യോഗത്തിനു വിളിച്ചിട്ടുള്ളത്.
പനി പടര്‍ന്നു പിടിക്കുന്ന സാഹചര്യത്തില്‍ സമരം അവസാനിപ്പിക്കണമെന്ന് ആരോഗ്യമന്ത്രി ആവശ്യപ്പെട്ടെങ്കിലും നഴ്സുമാര്‍ സമരത്തില്‍ ഉറച്ചു നില്‍ക്കുകയായിരുന്നു. കഴിഞ്ഞ 16 മാസമായി ചര്‍ച്ചകള്‍ നടന്നിട്ടും യാതൊരു വിധ തീരുമാനങ്ങളും ഉണ്ടാകാത്ത അവസ്ഥയിലാണ് സമരത്തിലേക്ക് കടന്നതെന്ന് സംഘടനാ ഭാരവാഹികള്‍ അറിയിച്ചു.
