അബുദാബി: അന്താരാഷ്‌ട്ര തലത്തിൽ കേരളത്തിന്റെ യശസ്സ് ഉയർത്തിയ വോളി ബോള്‍ താരവും അര്‍ജുന അവാര്‍ഡ് ജേതാവുമായ ജിമ്മി ജോര്‍ജിന്റെ സ്മരണ നില നിർത്തുവാൻ അബുദാബി കേരള സോഷ്യല്‍ സെന്റര്‍ അഞ്ചു ദിവസങ്ങളിലായി അബുദാബി സ്പോർട്ട്സ് ഹബ്ബിൽ ഒരുക്കുന്ന ജിമ്മി ജോര്‍ജ് മെമ്മോറിയല്‍ വോളിബോള്‍ ടൂർണ്ണ മെന്റ് ജൂൺ 25 ബുധനാഴ്ച തുടക്കമാവും എന്ന് സംഘടകര്‍ വാര്‍ത്താ സമ്മേളനത്തില്‍ അറിയിച്ചു.

അബുദാബി സ്‌പോര്‍ട്‌സ് കൗണ്‍സില്‍, എൽ. എൽ. എച്ച്. എന്നിവരുടെ സഹകരണത്തോടെ യാണ് ഈ വർഷം കെ. എസ്. സി- ജിമ്മി ജോര്‍ജ് മെമ്മോറിയല്‍ വോളിബോള്‍ ടൂർണ്ണമെന്റ് സംഘടിപ്പിക്കുന്നത്.

ജൂൺ 25, 26, 27, 28, 29 തിയ്യതികളില്‍ രാത്രി 8 മണിക്കു തുടക്കമാവുന്ന ടൂർണ്ണ മെന്റിൽ യു. എ. ഇ., ഇന്ത്യ, ഈജിപ്ത്, ലബനാന്‍, ശ്രീലങ്ക എന്നീ രാജ്യക്കാരായ പ്രഗത്ഭ താരങ്ങള്‍ യു. എ. ഇ. നാഷണല്‍ ടീം, എല്‍. എല്‍. എച്ച്. ഹോസ്പിറ്റല്‍, ഒണ്‍ലി ഫ്രഷ്, വേദ ആയുര്‍ വേദിക്, റഹ്മത്ത് ഗ്രൂപ്പ് ഓഫ് ആയുര്‍ കെയര്‍, ഓള്‍ സ്റ്റാര്‍ യു. എ. ഇ. എന്നീ ആറ് പ്രമുഖ ടീമുകൾക്കായി ഈ വർഷം കളത്തിലിറങ്ങും.

ലീഗ് കം നോക്ക് ഔട്ട് അടിസ്ഥാനത്തിലാണ് മത്സരം നടക്കുക. സെമിഫൈനല്‍ ഉള്‍പ്പെടെ രണ്ടു മത്സര ങ്ങളാണ് ഓരോ ദിവസങ്ങളിലും ഉണ്ടാവുക.

വിജയികള്‍ക്ക് ഒരു ലക്ഷം ദിര്‍ഹമാണ് സമ്മാനമായി നല്‍കുന്നത്. ചാമ്പ്യന്മാര്‍ക്ക് എല്‍. എല്‍. എച്ച്. ഹോസ്പിറ്റല്‍ നല്‍കുന്ന എവര്‍ റോളിങ് ട്രോഫി യും 50,000 ദിര്‍ഹം ക്യാഷ് പ്രൈസും രണ്ടാം സ്ഥാന ക്കാര്‍ക്ക് അയ്യൂബ് മാസ്റ്റര്‍ മെമ്മോറിയല്‍ ട്രോഫിയും 30,000 ദിര്‍ഹവും സമ്മാനിക്കും.

ജിമ്മി ജോര്‍ജ് മെമ്മോറിയല്‍ ഇന്റര്‍ നാഷണല്‍ വോളി ബോള്‍ ടൂർണ്ണ മെന്റിന്റെ സില്‍വര്‍ ജൂബിലി എഡിഷന്‍ കൂടിയാണിത്.

വാര്‍ത്താ സമ്മേളനത്തില്‍ കെ. എസ്‌. സി. പ്രസിഡണ്ട് എ. കെ. ബീരാന്‍ കുട്ടി, ജനറല്‍ സെക്രട്ടറി നൗഷാദ് യൂസുഫ്, ട്രഷറര്‍ വിനോദ് രവീന്ദ്രന്‍, ബുര്‍ജീല്‍ ഹോള്‍ഡിങ്‌സ് റീജണല്‍ ഡയരക്ടര്‍ ഡോ. നരേന്ദ്ര ഡി. സോണിഗ്ര, വേദ ആയുര്‍ എം. ഡി. റജീഷ്, മലയാളി സമാജം പ്രസിഡണ്ടും ടൂർണ്ണ മെന്റ് കോഡിനേറ്ററുമായ സലീം ചിറക്കല്‍, സ്‌പോര്‍ട്‌സ് സെക്രട്ടറി മുഹമ്മദലി തുടങ്ങിയവർ പങ്കെടുത്തു.