അബുദാബി :  ഭരത് മുരളി നാടകോത്സവം അഞ്ചാം ദിവസം അബുദാബി ശക്തി തിയ്യറ്റേഴ്‌സ് അവതരിപ്പിച്ച ‘സോവിയറ്റ് സ്റ്റേഷൻ കടവ്’ എന്ന നാടകം പ്രേക്ഷക പ്രശംസ ഏറ്റു വാങ്ങി. മലയാളത്തിലെ ആദ്യത്തെ ടൈം ട്രാവൽ നാടകം എന്ന് വിശേഷിപ്പിക്കാവുന്ന ‘സോവിയറ്റ് സ്റ്റേഷൻ കടവ്’ സമയത്തിലൂടെയും കാലത്തിലൂടെയും ഉള്ള ഒരു തിരിച്ചു പോക്കാണ് പ്രേക്ഷകർക്ക് സമ്മാനിക്കുന്നത്. ഏകാധിപത്യത്തിനും ഫാസിസ ത്തിനും എതിരെ ഈ നാടകം ശബ്ദമുയർത്തുന്നുണ്ട്.

ജനാധിപത്യത്തെ അധികാര ദുർവിനിയോഗം എങ്ങിനെ ഉന്മൂല നാശനം ചെയ്യപ്പെടുന്നു എന്ന് നാടകം പറയുന്നു. ഒരു കള്ളം പലതവണ പറഞ്ഞ് സത്യമാക്കുന്ന തന്ത്രത്തെ നാടകം അനാവരണം ചെയ്യുന്നു. അധികാരം മനുഷ്യനെ മാറ്റുന്നത് എങ്ങനെ എന്നും രാഷ്ട്ര ത്തലവന്മാർ പൂർവ്വ കാലം ഓർക്കുവാൻ ആഗ്രഹിക്കുന്നില്ല എന്നും ആക്ഷേപ ഹാസ്യത്തിൽ പറയുമ്പോൾ സമകാലിക രാഷ്ട്രീയവും ഓർമ്മയിൽ എത്തും.

മുരളീ കൃഷ്ണൻ്റെ ചെറുകഥക്ക് നാടക ഭാഷ്യം നൽകി സംവിധാനം ചെയ്തിരിക്കുന്നത് ഹസീം അമര വിള. പ്രകാശ് തച്ചങ്ങാട്, ശ്രീബാബു പിലിക്കോട്, ജയേഷ് നിലമ്പൂർ, ഫൈസാൻ നൗഷാദ്, സേതു മാധവൻ പാലാഴി, വേണു, അനീഷ ഷഹീർ തുടങ്ങിയവർ പ്രധാന കഥാ പാത്രങ്ങളെ അവതരിപ്പിച്ചു.

അബുദാബി : പന്ത്രണ്ടാമത് ഭരത് മുരളി നാടകോത്സവ ത്തിലെ നാലാം ദിനം ചേതന റാസൽ ഖൈമയുടെ ‘കെ. പി. ബാബുവിൻ്റെ പൂച്ച’ എന്ന നാടകം സമകാലീനത കൊണ്ടും അവതരണ രീതി കൊണ്ടും ശ്രദ്ധേയമായി.

ജാനാധിപത്യത്തിൻ്റെ നാലാം തൂണ് എന്നു വിശേഷിപ്പിക്കുന്ന മാധ്യമ രംഗത്തെ പോരായ്മകൾ നാടകം വരച്ചു കാട്ടുന്നു. ശരിയായ രീതിയിലുള്ള മാധ്യമ പ്രവർത്തന ആവശ്യകത നാടകം പറയുന്നു. രചനയും സംവിധാനവും നിർവ്വഹിച്ചത് യു. എ. ഇ. യിലെ അറിയപ്പെടുന്ന നാടക പ്രവർത്തകൻ ബിജു കൊട്ടില.

ഇരുപത്തിയാറോളം അഭിനേതാക്കൾ ഈ നാടകത്തിൽ ചെറുതും വലുതുമായ വേഷങ്ങൾ കൈകാര്യം ചെയ്തിട്ടുണ്ട്. ബിജു കൊട്ടില, സുർജിത് വാസുദേവൻ, ആതിര, ജ്യോതിഷ്, ഫായിസ്, അഖില, സിയ സുജിത് തുടങ്ങിയവരാണ് പ്രധാന കഥാപാത്രങ്ങൾക്ക് ജീവൻ നൽകിയത്.

സംഗീത സന്നിവേശം നൽകിയത് പന്ത്രണ്ടുകാരിയായ നന്ദിത ജ്യോതിഷ്. പ്രകാശ് പാടിയിൽ പ്രകാശ വിതാനവും രഞ്ജിത്ത്, സോജു, പ്രജീഷ് എന്നിവർ രംഗ സജ്ജീകരണവും കൈകാര്യം ചെയ്തു.

നാടകോത്സവം അഞ്ചാം ദിവസമായ ജനുവരി ആറ് ശനിയാഴ്ച രാത്രി 8.30 ന് ഹസീം അമരവിളയുടെ സംവിധാന ത്തിൽ അബുദാബി ശക്തി തിയ്യറ്റേഴ്‌സ് അവതരിപ്പിക്കുന്ന സോവിയറ്റ് സ്റ്റേഷൻ കടവ് എന്ന നാടകം അരങ്ങേറും. FB