അബുദാബി : പ്രമേഹ രോഗം അടക്കമുള്ള ആരോഗ്യ പ്രശ്നങ്ങൾ നേരിടുന്ന ഡ്രൈവർമാർ വാഹനം ഓടിക്കുന്നതിനു മുൻപായി പരിശോധനകൾ നടത്തണം എന്ന് അബുദാബി പോലീസ്. രക്തത്തിലെ പഞ്ചസാരയുടെ അളവ് പെട്ടെന്ന് താഴുന്നത് (ഹൈപ്പോ ഗ്ലൈസീമിയ) ഗുരുതരമായ അപകടങ്ങൾക്ക് കാരണമാവും.

സുഗമമായ യാത്രക്കിടെ ഗതി മാറി സഞ്ചരിച്ച് അപകടത്തിൽ പെടുന്ന കാറിന്റെ വീഡിയോ സോഷ്യൽ മീഡിയ പ്ലാറ്റ് ഫോമുകളിൽ പങ്കു വച്ചു കൊണ്ടാണ് പൊലീസിന്റെ മുന്നറിയിപ്പ്. കൃത്യ സമയത്ത് ഭക്ഷണം കഴിക്കാതിരിക്കുക, അമിതമായ ശാരീരിക അധ്വാനം, ഇൻസുലിൻ പോലെയുള്ള പ്രമേഹ മരുന്നുകളുടെ അളവിൽ ഉള്ള വ്യതിയാനം എന്നിവയാണ് രക്തത്തിൽ പഞ്ചസാര കുറയാൻ ഇടയാക്കുന്നത്.

തലചുറ്റൽ, തളർച്ച, ഏകാഗ്രത കുറവ്, അമിതമായ ഹൃദയമിടിപ്പ്, മന്ദഗതി, കൈ കാലുകൾക്കു വിറയൽ, അമിതമായ വിയർപ്പ്, കടുത്ത തളർച്ച, ആശയ കുഴപ്പം, പെട്ടെന്നുണ്ടാകുന്ന വിശപ്പ് എന്നിവയാണ് ഹൈപ്പോ ഗ്ലൈസീമിയയുടെ പ്രഥമ ലക്ഷണങ്ങൾ.

ഈ ലക്ഷണങ്ങൾ ഉണ്ടായാൽ ഉടനെ വാഹനം സുരക്ഷിതമായി മാറ്റിയിടുക. ശാരീരിക സ്ഥിതി സാധാരണ നിലയിലാവും വരെ വിശ്രമിക്കുക. രോഗ ശമനത്തിനുള്ള മരുന്നുകൾ യാത്രകളിലും കരുതുക. പ്രമേഹ നില താഴ്ന്നവർ അത് സാധാരണ ഗതിയിലും ആകും വിധം ഉള്ള ഭക്ഷണ പാനീയങ്ങൾ കഴിക്കുക.

വാഹനം ഓടിക്കുന്ന പ്രമേഹ രോഗികൾ കൂടുതൽ ജാഗ്രത പുലർത്തുക. സ്വന്തം ആരോഗ്യത്തോടൊപ്പം നിരത്തിലെ മറ്റുള്ളവരുടെ സുരക്ഷയും മുഖ്യം ആണെന്നും റോഡ് സുരക്ഷ എല്ലാവരുടെയും ഉത്തരവാദിത്വമാണ് എന്നും പോലീസ് ഓർമിപ്പിച്ചു.